లవర్ బాయ్‌కి లవర్స్ డే కలిసొచ్చేనా?

నువ్వే కావాలి, నువ్వే-నువ్వే, నువ్వు లేక నేను లేను వంటి రొమాంటిక్ లవ్ స్టోరీస్‌లో యూత్‌లో లవర్ బాయ్ ఇమేజ్‌ను సొంతం చేసుకున్న తరుణ్ లాంగ్ గ్యాప్ అనంతరం తనకు కలిసి వచ్చిన లవ్ జానర్‌లో ‘ఇది నా లవ్ స్టోరీ’ అంటూ ఫిబ్రవరి 14న ప్రేక్షకుల ముందుకు వస్తున్నాడు. రేపు ప్రేమికుల దినోత్సవం సందర్భంగా లవర్స్‌కి ‘నా లవ్ స్టోరీ’ మంచి గిఫ్ట్ అవుతుందంటున్నాడు తరుణ్. ఈ లవర్స్ డేతో మళ్లీ లవర్ బాయ్ హిట్ ట్రాక్ ఎక్కడం ఖాయమే అంటుంది చిత్రయూనిట్. ఈ మూవీలో తరుణ్ సరసన తమిళ బిగ్‌బాస్ రియాలిటీ షో ఫేమ్ ఓవియా హెలెన్ టాలీవుడ్‌కి పరిచయం అవుతుందడంతో ఈ మూవీపై అంచనాలు వచ్చేశాయి. ఆమె పేరుతో ఓవియా ఆర్మీ అంటూ హ్యాష్ ట్యాగ్‌తో సోషల్ మీడియాలో ఆమెకు బీభత్సమైన ఫాలోయింగ్ ఉంది.

కాగా ‘ఇది నా లవ్ స్టోరీ’ చిత్రంలో తరుణ్ రెండు షేడ్స్ ఉన్న పాత్రలో నటిస్తున్నాడు. ఇటీవల విడుదలైన ఈ మూవీ టీజర్, ట్రైలర్‌లకు రెస్పాన్స్ బాగానే ఉండటంతో పాటు సాంగ్స్ కూడా పర్వాలేదనిపిస్తున్నాయి. అభిరామ్ సమర్పణలో రామ్ ఎంటర్ టైనర్స్ పతాకంపై తెరకెక్కుతున్న ఈ సినిమాను రమేష్, గోపి దర్శకత్వం వహించారు. శ్రీనాథ్ విజయ్ సంగీతం అందించిన ‘ఇది నా లవ్ స్టోరీ’ రేపు ప్రేమికులను ఎంత వరకూ ఫిదా చేస్తుందో చూడాలి.