గుండు హన్మంతరావుకు తెలంగాణ ప్రభుత్వ సాయం

అనారోగ్యంతో బాధపడుతున్న ప్రముఖ హాస్యనటుడు గుండు హన్మంతరావుకు తెలంగాణ ప్రభుత్వం ఆర్థిక సహాయాన్ని ప్రకటించింది. చికిత్స నిమిత్తం రూ. 5 లక్షల నగదును ముఖ్యమంత్రి సహాయ నిధి నుంచి విడుదల చేసింది. ఈ విషయాన్ని ట్విట్టర్ ద్వారా వెల్లడించిన మున్సిపల్ శాఖ మంత్రి కేటీఆర్.. గుండు హన్మంతరావు త్వరగా కోలుకోవాలని ఆకాంక్షించారు. హన్మంతరావు కొంత కాలంగా కిడ్నీ వ్యాధితో బాధపడుతున్నారు. ఆయన అపోలో ఆసుపత్రిలో చికిత్స పొందుతున్నారు. వారానికి మూడు సార్లు డయాలసిస్ చేయాల్సి ఉందని వైద్యులు సూచించారు.

వైద్యానికి అవసరమైన ఆర్థిక స్థోమత లేకపోవడంతో గుండు హన్మంతరావు.. ఇంట్లోనే ఉండి చికిత్స తీసుకుంటున్నారు. అలీ నిర్వహిస్తున్న ఓ టీవీ కార్యక్రమం ద్వారా ఆయన అనారోగ్య పరిస్థితి వెలుగులోకి వచ్చింది. ఈ విషయాన్ని గుర్తించిన మూవీ ఆర్టిస్ట్ అసోసియేషన్ ఇటీవలే ఆయన ఆరోగ్య పరిస్థితి గురించి సినీ ప్రముఖుల దృష్టికి తీసుకెళ్లింది. స్పందించిన మెగాస్టార్ చిరంజీవి రూ.2 లక్షల ఆర్థిక సహాయాన్ని అందజేసి ఆదుకున్నారు.
Rs. 5 lakhs for treatment of popular cube artist Gundu Hanmanth Rao released from CM relief fund. pic.twitter.com/n7aGw2zfjO — KTR (@KTRTRS) January 8, 2018