సుమ రాజీవ్ కనకాల కుటుంబంలో విషాదం

తెలుగు యాంకర్ సుమ అత్త, నటుడు రాజీవ్‌ కనకాల తల్లి లక్ష్మీదేవి(78) శనివారం ఉదయం తుది శ్వాసను విడిచారు. దీంతో ఆ కుటుంబంలో విషాదం నెలకొంది. గ‌త కొంత కాలంగా అనారోగ్యంతో బాధ‌ప‌డుతున్న ఆమె ఈ రోజు ఉద‌యం త‌న‌ స్వ‌గృహంలో తుది శ్వాస విడిచారు. నటిగా, నాట్యకళాకారిణిగా తెలుగు ప్రజలకు సుపరిచతమైన లక్ష్మీదేవి 11 ఏళ్ల వయసులోనే నాటక రంగంలోకి ప్రవేశించిన కళామ తల్లికి సేవలు అందించారు. మొద‌ట‌ మద్రాస్‌ ఫిలిం ఇనిస్టిట్యూట్‌లో కళాకారులకు ఉపాధ్యాయురాలిగా ఆమె శిక్షణ ఇచ్చారు.

Read Also.. లక్ష్మీదేవి మృతిపై చిరంజీవి ఉద్వేగం

ప్రేమ బంధం ,పోలీస్ లాకప్, కొబ్బరి బొండం, ఒకఊరికథ మొదలైన చిత్రాల్లో చిత్రాల్లో నటించిన లక్ష్మీదేవి ఆ తరువాత సినిమాలకు దూరం అయ్యారు. 1971లో నటుడు దేవదాస్‌ కనకాలను ఆమె వివాహం చేసుకున్న అనంతరం వారి సొంత ఫిలిం ఇనిస్టిట్యూట్‌‌లో పలువురికి శిక్షణను ఇచ్చారు. మెగాస్టార్ చిరంజీవి, రజనీకాంత్, రాజేంద్ర ప్రసాద్, సుహాసిని, శుభలేఖ సుధాకర్ లాంటి వాళ్లు కూడా ఆమె దగ్గర శిక్షణ పొందిన వాళ్లే. ఆమెకు ఓ కొడుకు (రాజీవ్‌ కనకాల), కుమార్తె(శ్రీలక్ష్మి) ఉన్నారు.

రాజీవ్ కనకాల తల్లి లక్ష్మీదేవి మృతి పట్ల పలువురు ప్రముఖులు సంతాపం తెలియజేస్తున్నారు. ఈ సందర్భంగా మూవీ ఆర్టిస్ట్‌ అసోషియేషన్ ప్రగాఢ సంతాపం తెలియజేసింది. ఈ మేరకు మా అధ్యక్షుడు శివాజీరాజా, కార్యదర్శి నరేష్‌లు ఓ ప్రకటన విడుదల చేశారు. సినీ ఇండ‌స్ట్రీకి చెందిన ప‌లువురు ప్ర‌ముఖులు ఆమె ఆత్మ‌కి శాంతి క‌ల‌గాల‌ని కోరారు.