సిక్స్ ప్యాక్‌ హీరోని గుర్తు పట్టారా?

కండలు తిరిగిన ఆరడుగుల రాకుమారుడు సిక్స్ ప్యాక్‌తో దర్శనం ఇచ్చి అందరికీ షాక్ ఇచ్చాడు. అవునండీ మీరు ఊహించిందే కరెక్ట్.. అతను ఎవరో కాదు బిగ్‌బాస్ రియాలిటీ షో ద్వారా ఫేమస్ అయిన హీరో ప్రిన్స్. ‘నీకు నాకు డాష్ డాష్’ అంటూ తేజ దర్శకత్వంలో తెలుగు ఇండస్ట్రీకి పరిచయం అయ్యాడు హీరో ప్రిన్స్. బాస్‌స్టాప్, రొమాన్స్ వంటి చిత్రాల్లో నటించారు. అయితే ఇండస్ట్రీకి వచ్చి ఐదేళ్లైనా ప్రిన్స్‌కు బాగా గుర్తింపు తీసుకువచ్చింది మాత్రం ఎన్టీఆర్ హోస్ట్‌గా వ్యవహరించిన బుల్లితెర బిగ్గెస్ట్ రియాలిటీ షో ‘బిగ్ బాస్’ అనే చెప్పాలి. రంజుగా సాగిన ‘బిగ్‌బాస్ సీజన్ 1’ లో చివరి వరకూ గట్టిపోటీ ఇచ్చాడు.

అయితే ‘బిగ్‌బాస్’ హీరోగా నిలదొక్కుకునేందుకు మనోడికి హెల్ప్ కాలేకపోయింది. దీంతో చూడ్డానికి చాలా సాఫ్ట్‌గా కనిపించే ప్రిన్స్.. కండలు తిరిగిన సిక్స్ ప్యాక్, పెంచిన గడ్డంతో ఊరమాస్‌ లుక్‌లోకి వచ్చేశాడు. నేషనల్ లెవల్‌లో రోలర్స్ స్కేటింగ్‌‌తో పాటు క్రికెట్‌లో కూడా అలవోకగా సిక్స్‌లు కొట్టే ప్రిన్స్‌లో చాలా కళలు ఉన్నాయి. ఈ మధ్యకాలంలో హీరోగా అవకాశాలు రాకపోవడంతో ‘మిస్టర్’, ‘నేను శైలజ’ చిత్రాల్లో సపోర్టింగ్ క్యారెక్టర్స్‌తో సరిపెట్టుకున్నాడు ప్రిన్స్.

కాగా ప్రస్తుతం టాలీవుడ్‌తో పాటు బాలీవుడ్‌లో సిక్స్ ప్యాక్ ట్రెండ్ నడుస్తుండటంతో ఈవిధంగానైనా మనోడికి ఆఫర్స్ క్యూ కడతాయోమో చూడాలి. అయితే ఈ సిక్స్ ప్యాక్ కోసం ప్రిన్స్ చాలా కష్టపడుతున్నాడు. ఇందుకోసం ప్రత్యేకంగా ట్రైనర్‌ కూడా ఏర్పాటు చేసుకున్నాడు. ప్రిన్స్ పడుతున్న కష్టానికి తగ్గ ఫలితం దక్కాలనే కోరుకుందాం!