తెలుగులో ‘గ్యాంగ్’విడుదలకు అభ్యంతరాలు?

సూర్య హీరోగా తమిళంలో రూపొందిన ఒక సినిమా తెలుగులోకి ‘గ్యాంగ్’ పేరుతో విడుదల అవుతున్న సంగతి తెలిసిందే. వచ్చే ఏడాది పొంగల్ సందర్భంగా తమిళంలో విడుదల అయ్యే ఈ సినిమా అదే ఊపులో తెలుగులో కూడా విడుదల కానున్నదని ఇది వరకే ప్రకటించారు. తెలుగునాట సంక్రాంతి సినిమాలకు చాలా ముఖ్యమైన సీజన్ అని వేరే చెప్పనక్కర్లేదు. సంక్రాంతి రేసులో తెలుగులో ప్రముఖ హీరోల సినిమాలు ఇప్పటికే అనౌన్స్ అయ్యాయి. ఈ నేపథ్యంలో వాటికి జడవక సూర్య సినిమా కూడా వస్తుందని ప్రకటించారు.

అయితే.. ఈ సినిమా సంక్రాంతి విడుదల పట్ల టాలీవుడ్ ప్రొడ్యూసర్స్ కౌన్సిల్ అభ్యంతరం చెబుతోందని సమాచారం. సంక్రాంతి సీజన్ లో తెలుగులో భారీ బడ్జెట్ సినిమాలు పోటీలో ఉంటాయి కాబట్టి.. అప్పుడు సూర్య డబ్బింగ్ సినిమా విడుదల వద్దనే మాట కౌన్సిల్ నుంచి వినిపిస్తోందని టాక్.

ఇంత వరకూ తెలుగునాట డబ్బింగ్ సినిమాల విడుదలకు ఎలాంటి ఆంక్షలు, అభ్యంతరాలు లేవు. అయితే సంక్రాంతి సీజన్లో పెద్ద సినిమాలు ఉన్న నేఫథ్యంలో డబ్బింగ్ సినిమాల ప్రభావాన్ని తప్పించాలని.. అప్పుడు అనువాదపు బొమ్మలేవీ తెలుగునాట విడుదల కాకూడదనేది కౌన్సిల్ వాదనగా తెలుస్తోంది. అయితే.. ఎన్నడూ లేని నియమాలు ఇప్పుడు తెస్తారా? తేగలరా? అనేది సందేహమే. ఇందుకు సంబంధించి తర్జనభర్జనలు కొసాగుతున్నట్టు భోగట్టా.