‘దర్బార్’ సెకండ్ లుక్: తలైవా.. యంగర్, స్మార్టర్, టఫర్!

సూపర్ స్టార్ రజినీకాంత్ బయట చాలా సింపుల్‌గా ఉంటారు. హంగులు, ఆర్బాటాలు ఉండవు. అసలు రజినీ అంటే తెలియని వారికి ఆయన్ని చూపించి హీరో అని చెబితే నమ్మరు కూడా. అంత సర్వసాధారణంగా బయట తలైవా కనిపిస్తారు.

కానీ, కెమెరా ముందు ఆయనో సింహం. తనలోని రౌద్రాన్ని వెండితెరపై అద్భుతంగా చూపిస్తారు. వయసు పెరుగుతున్నా అదే స్టైల్, అదే నటన. ఏమాత్రం తేడాలేదు. స్టంట్లు కూడా అంతే ఈజీగా చేసుస్తున్నారు. ఈ ఏడాది సంక్రాంతికి వచ్చిన ‘పేట’ సినిమా దానికి పెద్ద ఉదాహరణ. ఇప్పుడు దానిని మించిన వినోదాన్ని ప్రేక్షకులకు పంచడానికి తలైవా సిద్ధమవుతున్నారు.

Also Read: ‘పహిల్వాన్’ ట్విట్టర్ రివ్యూ: ఎమోషనల్, హార్ట్ టచ్చింగ్

రజినీకాంత్ పవర్‌ఫుల్ పోలీస్ ఆఫీసర్‌గా నటిస్తోన్న చిత్రం ‘దర్బార్’. ప్రముఖ దర్శకుడు ఎ.ఆర్.మురుగదాస్ తెరకెక్కిస్తున్నారు. ప్రస్తుతం ఈ చిత్ర శరవేగంగా జరుగుతోంది. ఇప్పటికే విడుదలైన ఫస్ట్‌లుక్ ప్రేక్షకులను విశేషంగా ఆకట్టుకుంది. దీనికి తోడు సెట్ నుంచి లీకైన పోలీస్ లుక్‌తో పాటు పలు చిత్రాలు సోషల్ మీడియాలో విపరీతంగా వైరల్ అయ్యాయి. తలైవా ఈసారి అభిమానులకు పక్కా కమర్షియల్ ఎంటర్‌టైన్మెంట్‌ను ఇవ్వబోతున్నారని అభిమానులతో పాటు సినీ ప్రేమికులు ఆత్రుతగా ఎదురుచూస్తున్నారు.
ఈ నేపథ్యంలో తాజాగా వచ్చిన ‘దర్బార్’ సెకండ్ లుక్ సోషల్ మీడియాలో హీట్ జనరేట్ చేసింది. బ్లాక్ వెస్ట్‌లో రెండు చేతులతో రాడ్‌ను పట్టుకుని కోపంగా పైకిలేస్తోన్న రజినీ లుక్ అభిమానులను విశేషంగా ఆకట్టుకుంటోంది. లుక్ చాలా రఫ్‌గా ఉంది. ఈ పోస్టర్ చూస్తుంటే రజినీ సిల్వర్ స్క్రీన్‌ను షేక్ చేయడం ఖాయంగా కనిపిస్తోంది. ఈ పోస్టర్ గురించి దర్శకుడు ఎ.ఆర్.మురుగదాస్ ఆసక్తికర ట్వీట్ చేశారు.

‘‘యంగర్, స్మార్టర్, టఫర్.. ఇప్పటి వరకు చూడని అవతారంలో తలైవా’’ అని మురుగదాస్ ట్వీట్‌లో పేర్కొన్నారు. కాగా, ఇది రజినీకాంత్‌కు 167వ సినిమా. వచ్చే ఏడాది సంక్రాంతికి విడుదలవుతుంది. సుబస్కరన్ సమర్పణలో లైకా ప్రొడక్షన్స్ సంస్థ నిర్మిస్తోంది. రజినీకాంత్ సరసన నయనతార హీరోయిన్‌గా నటిస్తున్నారు. అనిరుధ్ రవిచందర్ సంగీతం సమకూరుస్తున్నారు.