హీరో అనే పదానికి సరైన నిర్వచనం చరణ్: కియారా అద్వానీ

‘భరత్ అనే నేను’ సినిమా ద్వారా తెలుగు తెరకు పరిచయమైన బాలీవుడ్ నటి కియారా అద్వానీ. సూపర్ స్టార్ మహేష్‌బాబు పక్కన ఎంతో అందంగా కనిపించిన ఈ భామ.. ఇప్పుడు మెగా పవర్ స్టార్ రామ్ చరణ్ సరసన మరో భిన్నమైన నపాత్రలో నటించింది. బోయపాటి శ్రీను దర్శకత్వంలో రామ్ చరణ్ హీరోగా తెరకెక్కిన పవర్‌ఫుల్ ఫ్యామిలీ యాక్షన్ ఎంటర్‌టైనర్ ‘వినయ విధేయ రామ’లో కియారా హీరోయిన్‌గా నటించింది. సంక్రాంతి కానుకగా ఈ సినిమాను జనవరి 11న విడుదల చేస్తున్నారు. సినిమా విడుదల తేదీ దగ్గర పడుతుండటంతో చిత్ర యూనిట్ ప్రచార కార్యక్రమాల జోరు పెంచింది. దీనిలో భాగంగా హీరోహీరోయిన్లు రామ్ చరణ్, కియారా అద్వానీ మీడియాకు ఇంటర్వ్యూ ఇచ్చారు.

ఈ ఇంటర్వ్యూలో కియారా అద్వానీ మాట్లాడుతూ.. తెలుగులో పూర్తిగా రెండు భిన్నమైన పాత్రలు తనకు దక్కడం ఎంతో అదృష్టమని ‘భరత్ అనే నేను’, ‘వినయ విధేయ రామ’ సినిమాలను ఉద్దేశించి చెప్పింది. ఇద్దరు అద్భుతమైన నటులతో నటించే అవకాశం తనకు దక్కిందని వెల్లడించింది. హీరో అనే పదానికి సరైన నిర్వచనం రామ్ చరణ్ అని కియారా కొనియాడింది. ఒక కమర్షియల్ హీరోకు ఉండాల్సిన లక్షణాలేంటి అని చరణ్ గురించి అడిగితే అన్ని బాక్సుల్లో తాను టిక్ చేస్తానని తెలిపింది. కేవలం యాక్షన్ సన్నివేశాల్లోనే కాదని.. ఎమోషన్, డ్రామా సీన్లపై కూడా చరణ్‌కు ఎంతో కమాండ్ ఉందని చెప్పింది.

తాను చాలా మంచి డ్యాన్సర్‌ని అని కియారా తెలిపింది. అయినప్పటికీ చరణ్‌తో సమానంగా కాలుకదపడం చాలా కష్టమని చెప్పింది. చరణ్ చాలా గ్రేసియస్‌ డ్యాన్సర్ అని, ఆయన ఎనర్జీ మరో స్థాయిలో ఉంటుందని, డ్యాన్స్ చేసేటప్పుడు ఆయన హావభావాలు అద్భుతంగా ఉంటాయని కియారా కొనియాడింది. ఇలాంటి డ్యాన్సర్‌తో కలిసి డ్యాన్స్ చేయడం నిజంగా చాలా సరదాగా ఉంటుందని చెప్పింది. సెట్స్‌లో చరణ్‌తో డ్యాన్స్ చేయడంతో ఎంతో సరదగా అనిపించేదని చెప్పుకొచ్చింది. సినిమాలో చరణ్‌ను రెండోసారి కలిసే సన్నివేశం అంటే తనుకు చాలా ఇష్టమని, అదేంటో మీరు సినిమాలోనే చూడాలని వెల్లడించింది.