​500 కోట్ల బడ్జెట్ తో ‘సంపూర్ణ రామాయణం’ హీరో అతడే?

బాహుబలి ఇచ్చిన ఉత్సాహంతో అత్యంత భారీ బడ్జెట్ తో హిందూ ఇతిహాసాలు, పురాణాల ఆధారం కొన్ని సినిమాల ప్రతిపాదనలు వచ్చాయి. వాటిల్లో ఏవి పట్టాలెక్కుతాయో తెలీదు కానీ, రామాయణ గాథ ఆధారంగా రూపొందే సినిమా మాత్రం వడివడిగా ఊపందుకొంటోంది. తాజాగా ఈ సినిమాకు టైటిల్ ను కూడా రిజిస్టర్ చేయించారు. గీతా ఆర్ట్స్ నుంచి ‘సంపూర్ణ రామాయణం’ పేరుతో ఒక టైటిల్ రిజిస్టర్ అయ్యింది. రామాయణగాథ ఆధారంగానే ఈ సినిమాను రూపొందించనున్నారని తెలుస్తోంది.

కొన్ని దశాబ్దాల కిందట ఇదే టైటిల్ తో శోభన్ బాబు రాముడిగా నటించగా బాపు దర్శకత్వంలో సినిమా రూపొందింది. మరి నయా ‘సంపూర్ణ రామాయణం’లో హీరోగా రామ్ చరణ్ తేజ నటించనున్నాడనే మాట వినిపిస్తోంది. ఈ సినిమాను అత్యంత భారీ బడ్జెట్ తో రూపొందించనున్నారు. గీతా ఆర్ట్స్ అధినేత అల్లు అరవింద్ తో పాటు మధు మంతెన, సమిత్ మల్హోత్రాలు ఈ సినిమా నిర్మాణంలో పాలు పంచుకోనున్నట్టుగా తెలుస్తోంది.

ఈ సినిమాను పలు భారతీయ భాషల్లో విడుదల చేయనున్నారని, త్రీడీలో రూపొందించనున్నారని సమాచారం. త్వరలోనే ఈ సినిమా గురించి అధికారిక ప్రకటన రానున్నదని, ఈ ఏడాది ఆఖరులో షూటింగ్ ప్రారంభం కానున్నదని తెలుస్తుంది. రాముడిగా రామ్ చరణ్ నటిస్తే.. మిగతా పాత్రల్లో ఎవరు నటిస్తారనేది అమితాసక్తిని రేకెత్తిస్తున్న అంశం. త్వరలోనే వీటిపైనా స్పష్టత రానుంది.