‘ఆ నలుగురు’ సినిమా దర్శకుడు మదన్ పరిస్థితి అత్యంత విషమం

టాలీవుడ్‌లో ‘ఆ నలుగురు’ సినిమాతో అందర్నీ ఆలోచింప చేసిన దర్శకుడు మదన్ (Director Madan) ఆరోగ్య పరిస్థితి అత్యంత విషమంగా ఉంది. 4 రోజుల కిందట ఆయన బ్రెయిన్ స్ట్రోక్‌కు గురయ్యారు. కుటుంబసభ్యులు అపోలో ఆస్పత్రిలో చేర్పించి చికిత్స అందిస్తున్నారు. జగపతి బాబు హీరోగా నటించిన ‘పెళ్లైన కొత్త’లో సినిమాతో దర్శకుడిగా పరిచయం అయిన మదన్.. గుండె ఝల్లుమంది, ప్రవరాఖ్యుడు, కాఫీ విత్ మై వైఫ్, గరం, గాయత్రి లాంటి భిన్నమైన చిత్రాలకి దర్శకత్వం వహించారు. ఆంధ్రప్రదేశ్‌లోని అన్నమయ్య జిల్లాలోని మదనపల్లిలో పుట్టి పెరిగిన మదన్.. శ్రీ వెంకటేశ్వర యూనివర్సిటీలో చదువుకున్నారు. కాలేజీ రోజుల్లోనే నాటకాలు వేసినట్లు గతంలో ఆయన చెప్పారు. ఆ తర్వాత సినిమాలపై ఉన్న మక్కువతో హైదరాబాద్‌కి వచ్చేశారు. ఇండస్ట్రీకి వచ్చిన కొత్తలో అసిస్టెంట్ కెమెరామెన్‌గా ఎస్ గోపాల్ రెడ్డి దగ్గర పనిచేశారు. అనంతరం కొన్ని చిత్రాలకి సహ రచయితగా వ్యవహరించారు. ఆ తర్వాత దర్శకుడిగా మారారు.

పెళ్లైన కొత్తలో సినిమా ద్వారా భార్యభర్తల మధ్య ఇగో ఉంటే ఏమవుతుందో చూపించిన మదన్.. ఆ నలుగురు సినిమాలో లోకం పోకడని పరిచయం చేస్తూనే మంచితనంతో ఉంటే చివరికి ఎలాంటి గౌరవం లభిస్తుందో గుర్తు చేశారు. భిన్నమైన చిత్రాలు తీసి అతి తక్కువ వ్యవధిలోనే మంచి గుర్తింపు సాధించారు మదన్. ఆయన త్వరగా కోలుకోవాలని పలువురు ప్రముఖులు, అభిమానులు ప్రార్థిస్తున్నారు.

Read Latest Telugu Movies News , Telugu News