పృథ్వీ విడాకుల కేసు: నెలకు రూ.8 లక్షలు భరణం!

30 ఇయర్స్ ఇండస్ట్రీగా పేరు తెచ్చుకున్న ప్రముఖ హాస్యనటుడు పృథ్వీరాజ్ విడాకుల కేసులో కుటుంబ న్యాయస్థానం తీర్పు వెలువరించింది. భార్యకు భరణం కింద నెలకు రూ. 8 లక్షలు చెల్లించాలని విజయవాడ ఫ్యామిలీ కోర్టు ఆదేశాలు జారీ చేసింది. విజయవాడకు చెందిన శ్రీలక్ష్మిని శేషు అలియాస్ మూర్తి అలియాస్ బాలిరెడ్డి పృథ్వీరాజ్ 1984లో వివాహం చేసుకున్నాడు. వీరికి ఇద్దరు పిల్లలు కూడా ఉన్నారు. పృథ్వీరాజ్‌ నటనపై ఆసక్తితో అవకాశాలు వెదుక్కొంటూ చెన్నైకి ప్రయాణమయ్యాడు. చెన్నై చేరుకుని చిన్న చిన్న అవకాశాలను దక్కించుకుంటూ కుటుంబాన్ని హైదరాబాద్‌కు మార్చారు.

హైదరాబాద్ వచ్చిన తర్వాత భార్యతో విభేదాలు ఎక్కువ కావడంతో గతేడాది అమెను ఇంటి నుంచి గెంటేశాడు. వీరి మధ్య రాజీకి పెద్దలు ప్రయత్నించినా పృథ్వీ పట్టించుకోలేదు. దీంతో భార్య శ్రీలక్ష్మి గత నవంబరులో అతడిపై ఫిర్యాదు చేసింది. కుటుంబ న్యాయస్థానంలో భరణం కోరుతూ కేసు దాఖలైంది. తన భర్త ఆదాయ పరిస్థితి బాగానే ఉందని నెలకు రూ. 10 లక్షలు భరణం ఇప్పించాలని ఫ్యామిలీ కోర్టుకు తెలిపింది. కేసును విచారించిన న్యాయస్థానం బాధితురాలికి నెలకు రూ. 8 లక్షలు పృథ్వీ భరణం కింద ఇవ్వాలని తీర్పిచ్చింది.

పృథ్వీ తనను పెళ్లి చేసుకుని మోసం చేశాడంటూ కవిత అనే మహిళ బంజారా హిల్స్ పోలీసులను గత అక్టోబరులో ఆశ్రయించింది. పశ్చిమగోదావరి జిల్లా గోకవరం గ్రామానికి చెందిన కవిత(30) బంజారాహిల్స్ రోడ్ నెం. 14లోని నటుడు పృథ్వీరాజ్ కార్యాలయంలో రిసెప్షనిస్టుగా చేరింది. అప్పటికే పెళ్లయిన కవిత భర్తకు విడాకులు ఇచ్చి పృథ్వీతో కొంతకాలం సహజీవనం చేసింది. వివాహం చేసుకుని నాలుగేళ్లపాటు తనతో కాపురం చేసి మోసం చేయడమే కాకుండా వేధింపులకు పాల్పడుతున్నారని ఆ మహిళ పోలీసులకు ఫిర్యాదు చేసింది. బాధితురాలి ఫిర్యాదు మేరకు 498ఏ, 420 సెక్షన్ల కింద బంజారాహిల్స్‌ పోలీస్‌స్టేషన్‌లో కేసు నమోదు చేశారు.