రిపోర్టర్ తిక్క కుదిర్చిన ‘ట్యూబ్‌లైట్’ పిల్లాడు!

బాలీవుడ్ కండల వీరుడు సల్మాన్ ఖాన్ ప్రధాన పాత్రలో నటించిన ‘ట్యూబ్‌లైట్’ సినిమాలోని బాల నటుడుని ఓ రిపోర్టర్ వింత ప్రశ్న అడిగింది. ఎనిమిదేళ్ల ఆ బాల నటుడు రిపోర్టర్ ప్రశ్నకు తడుముకోకుండా సమాధానమిచ్చి తిక్క కుదిర్చాడు. విషయంలోకి వెళ్తే.. ‘ట్యూబ్‌లైట్’ సినిమా ప్రమోషన్‌లో భాగంగా ఇటీవల చిత్ర యూనిట్ మీడియా సమావేశం నిర్వహించింది. దీనికి బాల నటుడు మాటిన్ రే టాంగు కూడా వచ్చాడు. రిపోర్టర్లు సల్మాన్, టాంగులను ప్రశ్నలు అడుగుతున్నారు. ఈ సమయంలో ఓ లేడీ రిపోర్టర్ అర్థం పర్థం లేని ప్రశ్నను సంధించింది.

‘నువ్వు ఇండియాకి మొదటి సారి వచ్చావా?’ అని అడిగింది. అయితే టాంగుకి ఆమె ఏమడిగిందో అర్థం కాలేదు. మళ్లీ మళ్లీ అడిగాడు. సల్మాన్ ఖాన్ కల్పించుకుని టాంగుకి అర్థమయ్యేలా చెప్పాడు. వెంటనే స్పందించిన టాంగు.. ‘నేనుండేదే ఇండియాలో అయితే.. మళ్లీ ఇండియాకు రావడమేంటి?’ అని నవ్వుతూ సమాధానం ఇచ్చాడు. దీంతో అక్కడున్నవారంతా ఒక్కసారిగా నవ్వేశారు. వాస్తవానికి టాంగు స్వస్థలం అరుణాచల్ ప్రదేశ్‌లోని ఇటానగర్. మరి మనదేశానికి చెందిన పిల్లాడినే ఇక్కడికి తొలిసారి వచ్చావా? అంటే కోపం రాదు. అందుకే రిపోర్టర్‌కు తిక్క కుదిరే సమాధానం ఇచ్చాడు.

ఇంతకీ ఆ రిపోర్టర్.. టాంగుని ఇబ్బంది పెట్టడానికో లేక ఆటపట్టించడానికో ఈ ప్రశ్న అడిగినట్టుంది. ఏదేమైతేనేం ఇప్పుడు ఆ వీడియో వైరల్ అవుతోంది. ముద్దు ముద్దు మాటలతో టాంగు చెప్పే సమాధానం చూడముచ్చటగా ఉంది. సినో-ఇండియా యుద్ధ నేపథ్యంలో తెరకెక్కిన ‘ట్యూబ్‌లైట్’లో సల్మాన్ ఖాన్‌కు బుల్లి తమ్ముడిగా టాంగు నటించాడు. ఈ సినిమా ద్వారా చైనా నటి ఝు ఝు బాలీవుడ్‌కు పరిచయమవుతోంది. ఈ శుక్రవారం (జూన్ 23) ‘ట్యూబ్‌లైట్’ ప్రేక్షకుల ముందుకు వస్తోంది.