Tv9పై తప్పుడు ప్రచారం.. పవన్ కళ్యాణ్‌పై కేసు నమోదు

జనసేన అధినేత, పవర్ స్టార్ పవన్ కళ్యాణ్‌పై హైదరాబాద్ బంజారా హిల్స్ పోలీస్ స్టేషన్‌లో కేసు నమోదైంది. ప్రముఖ ఛానల్ Tv9పై ట్విట్టర్ ద్వారా అసత్య ఆరోపణలు చేస్తూ.. ఛానల్ క్రెడిబిలిటీని దెబ్బతీసినందుకు గాను పవన్ కళ్యాణ్‌పై ఐపీసీ సెక్షన్ 469, 504, 506 సెక్షన్ల క్రింద బుధవారం నాడు కేసు నమోదైంది. ఈ కేసు ప్రాథమిక దర్యాప్తులో భాగంగా ఎలక్ట్రానికి ఎవిడెన్స్ ట్యాపరింగ్ చేసినట్టు వెల్లడి కావడంతో కేసును రిజిష్టర్ చేశారు బంజారాహిల్స్ పోలీసులు.

టీవీ 9, ఏబీఎన్, టీవీ 5 ఛానల్స్‌ను నిషేదించాలని కోరుతూ పవన్ పిలుపునిచ్చిన సంగతి తెలిసిందే. మీడియా కధనాలను వక్రీకరిస్తూ పవన్ కళ్యాణ్ ట్విటర్‌లో వ్యాఖ్యలు, ఆరోపణల పట్ల కొన్ని పాత్రికేయ సంఘాలు అభ్యతరం తెలుపుతూ నిరసను దిగారు. ఎటువంటి ఆధారాలు లేకుండా అసత్య ఆరోపణలు చేయడం తగదంటూ పలు జర్నలిస్ట్ సంఘాలు పవన్ వైఖరిని ఖండించాయి. ఆయా ఛానల్స్‌పై అసత్య ప్రచారం చేసిన పవన్ బహిరంగ క్షమాపణ చెప్పాలంటూ డిమాండ్ చేశారు. పవన్ వీరి డిమాండ్‌లపై స్పందించకపోగా.. ట్విట్టర్‌లో తన ట్వీట్స్ వార్‌ని కొనసాగిస్తూనే ఉన్నారు. తనకు, తన తల్లికి జరిగిన అన్యాయంపై, మీడియా ప్రసారం చేసిన కథనాలపై తన దైన శైలిలో ప్రశ్నల వర్షం కురిపిస్తూనే ఉన్నారు.