U Turn Collecction: యూటర్న్.. ఫస్ట్ డే కలెక్షన్స్ ఫర్వాలేదు!

దాదాపు 12 కోట్ల రూపాయల వసూళ్లను సాధిస్తే సమంత ‘యూటర్న్’ సేఫ్ వెంచర్ అయ్యే అవకాశం ఉంది. ఈ సినిమాను దాదాపు 16 కోట్ల రూపాయల ప్రీ రిలీజ్ మార్కెట్‌తో విడుదల చేశారు. అయితే అందులో తమిళం వాటా కొంత ఉంది. అది పోనూ తెలుగు వరకూ ఈ సినిమా మార్కెట్ 12 కోట్ల రూపాయలు అని ట్రేడ్ నిపుణులు చెబుతున్నారు.

సమంత సోలోగా నటించిన ఈ సినిమాకు 12 కోట్ల రూపాయల వసూళ్లు పెద్ద టార్గెట్టే. వాటిని రాబట్టుకోవడం అంత ఈజీ వ్యవహారం ఏమీ కాదు. అయితే ‘యూటర్న్’కు పాజిటివ్ టాక్ వచ్చింది. ఈ థ్రిల్లర్ అలరిస్తుందని రివ్యూయర్లు పేర్కొన్నారు. అలాగే ఈ సినిమా పట్ల యూత్ నుంచి, థ్రిల్లర్ మూవీస్‌ను ఇష్టపడే వారి నుంచి ఆసక్తి వ్యక్తం అవుతోంది. దీంతో ఈ సినిమాకు ఫర్వాలేదనిపించే స్థాయి ఓపెనింగ్సే దక్కాయి.

తొలి రోజున ‘యూటర్న్’ యూఎస్ లో అరవై లక్షల రూపాయల వసూళ్లను సాధించినట్టుగా సమాచారం. ఇక తెలుగు రాష్ట్రాల్లో ఈ సినిమా సాధించిన కలెక్షన్ల వివరాలు ఇంకా అందాల్సి ఉంది. అయితే యూఎస్ మార్కెట్లో నాగచైతన్య సినిమా ‘శైలజారెడ్డి అల్లుడు’ ముందు ‘యూటర్న్’ తక్కువ వసూళ్లనే సాధించింది. యూఎస్ లో తొలి రోజున శైలజారెడ్డి అల్లుడు కోటిన్నర రూపాయల వసూళ్లను సాధించింది.