హీరో వరుణ్ ధావన్‌‌ను వేధిస్తోన్న యువతి!

స్టూడెంట్ ఆఫ్ ది ఇయర్ చిత్రంతో బాలీవుడ్‌‌కు పరిచయమైన యువ నటుడు వరుణ్‌ ధావన్‌ అనతి కాలంలోనే క్రేజ్ తెచ్చుకున్నాడు. అయితే తనను ఒక యువతి కొంతకాలంగా వేధింపులకు గురిచేస్తోందని శాంతాక్రూజ్ పోలీస్ స్టేషన్‌లో నవంబరు 2 న ఆయన ఫిర్యాదు చేశాడు. రాత్రివేళలోనూ ఫోన్ చేయడం, మెసేజ్‌లు పంపి వేధిస్తోందని, త్వరగా ఆమెపై చర్యలు తీసుకోవాలని కోరాడు. వివరాల్లోకి వెళ్తే... ముంబైకి చెందిన ఓ యువతి వరుణ్‌ ధావన్ మొబైల్ నెంబరు సంపాదించి, తరచూ వాట్సాప్‌లో మెసేజ్‌లు చేసేది. ఆమె మెసేజ్‌లకు మొదట్లో స్పందించిన వరుణ్.. హద్దులు దాటుతుండడంతో వార్నింగ్ ఇచ్చాడు.

అయినా ఆమె వినకపోవడంతో నెంబరును బ్లాక్ లిస్ట్‌లో పెట్టాడు. కొన్ని రోజుల తర్వాత ఓ అపరిచిత వ్యక్తి ఫోన్ చేసి, ఆమె మెసేజ్‌లకు సమాధానం ఇవ్వకపోతే ఆత్మహత్య చేసుకుంటుందని హెచ్చరించాడు. దీంతో ఇక ఆలస్యం చేస్తే ప్రమాదకరమని భావించిన వరుణ్ ధావన్ లీగల్ అడ్వైజర్‌ను కలిసి జుహూ పోలీసులను ఆశ్రయించాడు. అయితే వారి నివాసం శాంతాక్రూజ్ స్టేషన్ పరిధిలోకి వస్తుందని, కాబట్టి అక్కడ ఫిర్యాదు చేయాలని జుహూ పోలీసులు పేర్కొన్నారు. దీంతో శాంతాక్రూజ్ పోలీసులకు వరుణ్ ఫిర్యాదు చేశాడు. ఆయన ఫిర్యాదు ఆధారంగా కేసు నమోదు చేసిన పోలీసులు త్వరలోనే ఆమె వివరాలు కనుక్కుని కౌన్సిలింగ్ ఇప్పిస్తామని తెలిపారు. వరుణ్ ఇచ్చిన వివరాల ఆధారంగా ఆ మొబైల్‌ నెంబరును కాంటాక్ట్ చేయడానికి ప్రయత్నిస్తే స్విచ్ఛాఫ్ చేసి ఉందని పోలీసులు తెలియజేశారు.

అలాగే సైబర్ పోలీసులకు కూడా దీనిపై వరుణ్ ధావన్ ఫిర్యాదు చేశాడు. వరుణ్ ధావన్‌కు అమ్మాయిల నుంచి ఇలాంటి అనుభవం ఎదురవడం ఇదే తొలిసారి కాదు. గత జూన్‌లో రాయ్‌పూర్‌కు చెందిన 17 ఏళ్ల యువతి అదితి సురానా ఇంటిలో చెప్పకుండా అయనను కలుసుకోడానికి ముంబైకి వచ్చింది. కంజుమార్గ్ రైల్వే స్టేషన్‌లో అనుమానస్పదంగా తిరుగుతోన్న ఆ యువతిని గుర్తించిన పోలీసులు అసలు విషయం ఆరా తీసి వరుణ్‌ను కలుసుకోడానికి ఏర్పాటు చేశారు. తన కోసం ఇంటిలో చెప్పకుండా వచ్చిన ఆ యువతిని వరుణ్ ధావన్ మందలించి పంపిచేశారు.