దూసుకెళ్తున్న ‘నారప్ప’ ట్రైలర్.. వెంకీ మామా సినిమా అంటే మాములుగా ఉండదుగా మరి!

దగ్గుబాటి వెంకటేష్ హీరోగా, సీనియర్ నటి ప్రియమణి హీరోయిన్‌గా తెరకెక్కుతున్న యాక్షన్ చిత్రం ‘నారప్ప’. తమిళంలో సూపర్‌హిట్‌గా నిలిచిన ‘అసురన్’ రీమేక్‌గా ఈ సినిమా రూపొందుతోంది. సురేష్ ప్రొడక్షన్స్ బ్యానర్‌పై దగ్గుబాటి సురేష్ బాబు నిర్మిస్తున్న ఈ సినిమాకి శ్రీకాంత్ అడ్డాల దర్శకత్వం వహించారు. తమిళ సినిమాకు ఏ మాత్రం తీసిపోకుండా తెలుగులో రీమేక్ చేశారు. ఎంతోకాలం నుంచి విడుదలకు సిద్ధంగా ఉన్న ఈ సినిమా లాక్‌డౌన్ కారణంగా వాయిదాపడుతూ వచ్చింది. తాజాగా ఈ సినిమాని ఈ జూలై 20వ తేదీన అమెజాన్ ప్రైమ్‌లో విడుదల చేసేందుకు రెడీ అయింది చిత్ర యూనిట్.

ఇప్పటికే వెంకటేష్ పుట్టినరోజు సందర్భంగా విడుదల చేసిన సినిమా టీజర్.. కొన్ని రోజుల క్రితం విడుదల చేసిన ‘చలాకీ చిన్నమ్మ’ అనే పాట ప్రేక్షకులను విశేషంగా ఆకట్టుకున్నాయి. తాజాగా ఈ సినిమా ట్రైలర్‌ని విడుదల చేశారు. ఇందులో వెంకటేష్ డిఫరెంట్ లుక్, ప్రియమణి నాచురల్ అందాలు ఆకట్టుకున్నాయి. ఇందులో చూపించిన సన్నివేశాలు సినిమాపై ఉన్న ఆసక్తిని రెట్టింపు చేశాయి. రెండు డిఫరెంట్ లుక్స్‌లో వెంకీ చేసిన ఫైట్ సీన్స్ హైలైట్ అయ్యాయి. ముఖ్యంగా మణిశర్మ అందించిన బ్యాక్‌గ్రౌండ్ మ్యూజిక్ టీజర్‌ని మరో లెవల్‌కి తీసుకెళ్లింది.

ప్రస్తుతం ఈ ట్రైలర్ ఇంటర్నెట్‌లో దూసుకుపోతోంది. విడుదల చేసి 24 గంటలు గడవకముందే అన్ని ఫ్లాట్‌ఫామ్‌లలో కలిపి 10 మిలియన్ వ్యూస్ దాటింది. దీనిపై వెంకటేష్ పోస్ట్ చేశారు. ‘నారప్ప ట్రైలర్‌పై ఇంత ప్రేమని చూపించి.. ఇంతలా ఆదరించినందుకు ఎంతో ఆనందంగా, గర్వంగా ఉంది’ అంటూ వెంకటేష్ పేర్కొన్నారు. ఇక ఈ సినిమాలో రావు రమేష్, రాజీవ్ కనకాల తదితరులు కీలక పాత్రల్లో నటిస్తున్నారు. వెంకటేశ్ కెరీర్‌లో ఇది 74వ సినిమా కావడంతో దీనిపై దగ్గుబాటి అభిమానులు భారీ అంచనాలు పెట్టుకున్నారు.