సినీ ఇండస్ట్రీలో మరో విషాదం.. ప్రముఖ సినిమాటోగ్రాఫర్ మృతి

ప్రముఖ సినిమాటోగ్రాఫర్ బి.కన్నన్ తుదిశ్వాస విడిచారు. గుండె సంబంధ సమస్యలతో చెన్నైలో ఆయన కన్నుమూశారు. ఆయన వయసు 69 ఏళ్లు. గత కొన్ని రోజులుగా ఆయన హృదయ సంబంధిత సమస్యతో బాధపడుతున్నారు. ఇటీవల ఆయనకు శస్త్రచికిత్స కూడా చేశారు. అయినా ఆయన ఆరోగ్యం మాత్రం పూర్తిగా కుదుటపడలేదు. దీంతో శనివారం మధ్యాహ్నం 2 గంటల ప్రాంతంలో పరిస్థితి విషమించి కన్నన్‌ మృతి చెందారు. ఆయన మృతిపట్ల పలువురు సినీ ప్రముఖులు దిగ్భ్రాంతి వ్యక్తం చేశారు. సినీ ఇండస్ట్రీలో తాజాగా అనేక విషాద ఘటనలు చోటుచేసుకున్నాయి. బాలీవుడ్‌లో అనేకమంది ప్రముఖులు మరణించిన విషయం తెలిసిందే.
Read More:రమ్యకృష్ణ కారులో భారీగా మద్యం.. డ్రైవర్ అరెస్ట్
'2020 సంవత్సరం ఏ మాత్రం బాలేదు. మరో గొప్ప వ్యక్తి, ప్రముఖ సినిమాటోగ్రాఫర్‌ కన్నన్‌ను కోల్పోయాం. 'కెప్టెన్‌ మగళ్‌' సినిమా కోసం ఆయనతో కలిసి పనిచేశా. భారతీరాజా సర్ పర్మనెంట్‌ కెమెరామెన్‌ ఆయన. ఆయన కుటుంబ సభ్యులకు నా సానుభూతి తెలుపుతున్నా. మిమ్మల్ని చాలా మిస్‌ అవుతున్నాం కన్నన్‌ సర్‌' అని ఖుష్బూ ట్వీట్‌ చేశారు. తమిళం, మలయాళంలో 50కి పైగా సినిమాలకు ఆయన పని చేశారు. కన్నన్‌ తెలుగులో 'పగడాల పడవ', 'కొత్త జీవితాలు', 'సీతాకోక చిలుక', 'ఆరాధన' సినిమాలకు సినిమాటోగ్రఫీ బాధ్యతలు నిర్వర్తించారు. ప్రముఖ దర్శకుడు భారతీరాజాతో కన్నన్ కు మంచి అనుబంధం ఉంది. ఆయనతో కలిసి 40 సినిమాలకు పని చేశారు. ఈ సాయంత్రం 6 గంటలకు ఆయన పార్థివదేహాన్ని అల్వార్ పేటలోని ఆయన నివాసం వద్ద ఉంచుతారు. రేపు అంత్యక్రియలను నిర్వహిస్తారు. కన్నన్ కు భార్య, ఇద్దరు కుమార్తెలున్నారు.