'ఆడాళ్లూ మీకు జోహార్లు' అంటున్న 'గురు' గారు

టాలీవుడ్‌ విక్టరీ హీరో వెంకటేశ్ చేసే సినిమాలంటేనే సంథింగ్ స్పెషల్. స్టార్ డమ్‌ను పక్కన పెట్టి మంచి కథాబలం ఉండే సినిమాలకు వెంకీ ప్రాధాన్యతనిస్తాడు. ముఖ్యంగా ఆడవారికి వెంకీ సినిమాలంటే ప్రత్యేక ఆదరణ. వెంకటేశ్ సినిమా రిలీజ్ అయితే కుటుంబం అంతా కలిసి వెళ్లొచ్చు అనే నమ్మకం ఉంది. ప్రస్తుతం వెంకటేశ్ నటిస్తున్న 'గురు' షూటింగ్ పూర్తి చేసుకుంది. కొత్త సంవత్సరంలో ప్రారంభంలోనే ఈ సినిమా విడుదలకు సన్నాహాలు చేస్తున్నారు. ఇదిలా ఉండగానే వెంకీ చేయబోయే తన తదుపరి చిత్రం కూడా ఖరారైపోయింది.



గతంలో 'ఆడువారి మాటలకు అర్థాలే వేరులే' అన్న వెంకటేశ్ ఇప్పుడు 'ఆడాళ్లూ మీకు జోహార్లు' అంటున్నారు. 'నేను.. శైలజ' లాంటి సూపర్ హిట్ సినిమాను రూపొందించిన కిషోర్ తిరుమల దర్శకత్వంలో వెంకటేశ్ - నిత్యామెనన్ హీరోహీరోయిన్లుగా 'ఆడాళ్లూ మీకు జోహార్లు' అనే సినిమా తెరకెక్కబోతుంది. ఈ సినిమాలో వెంకటేశ్ లుక్ సరికొత్తగా ఉండబోతోందట. ఈ సినిమాకు పి. రామ్ మోహనరావు నిర్మాతగా వ్యవహరించనున్నారు. ప్రస్తుతం స్క్రిప్ట్ పనులు పూర్తయ్యాయి, త్వరలోనే సెట్స్ పైకి తీసుకెళ్లనున్నామని దర్శకుడు కిషోర్ వెల్లడించారు.