విద్యాబాలన్‌తో అసభ్యంగా ప్రవర్తించిన అభిమాని

బాలీవుడ్ స్టార్ హీరోయిన్ విద్యా బాలన్‌కి ఇటీవల కోల్‌కతా‌లో జరిగిన ఓ చేదు అనుభవం మరిచిపోకముందే మరోసారి ముంబైలో అటువంటే ఘటనే ఎదురైంది. ముంబైలో ప్రసిద్ధిగాంచిన దేవాలయం సిద్ధి వినాయక ఆలయానికి వెళ్లి పూజల్లో పాల్గొంటున్న విద్యా బాలన్‌ని వెనక నుంచి వచ్చిన ఓ అభిమాని ఆమె భుజాలపై తాకుతూ... తన భార్యకి హలో చెప్పాల్సిందిగా అడిగాడు. అతడు ఎవరో కూడా తెలియనప్పటికీ అప్పటికే పూజలో నిమగ్నమైన విద్యాబాలన్ పోనీలే అన్నట్టుగా కొద్దిసేపు వెయిట్ చేయండి అని మళ్లీ పూజల్లో లీనమైంది.

అయితే, విద్యాబాలన్ అంత ఓపిగ్గా చెప్పినప్పటికీ, అతడు మాత్రం ఆమె పూజ పూర్తి చేసుకునే వరకు ఓపిక పట్టలేకపోయాడు. ఆమె చెప్పిన వెంటనే మరోసారి భుజంపై తడుతూ తన భార్యకి హలో చెప్పాల్సిందిగా అడిగాడు. దీంతో తన అభిమాని వైఖరి పట్ల విసుగుచెందిన విద్యాబాలన్ అతడిపై సీరియస్ అయ్యారట. ఒకవేళ ముక్కు, మొహం తెలియని ఓ వ్యక్తి వచ్చి నీ భార్యని ఇలాగే తాకితే, నీకు ఓకేనా ? అలా అయితే నీకు ఏం ఇబ్బందిగా అనిపించదా అని అతడిని కడిగిపారేసిందట విద్యా బాలన్. సిద్ధి వినాయక ఆలయంలో జరిగిన ఈ ఘటన గురించి విద్యాబాలనే స్వయంగా స్పాట్‌బాయ్‌కి వెల్లడించినట్టు సమాచారం.