విజయ్ దేవరకొండ అంటే ఇష్టమన్న హీరోయిన్!

టాలీవుడ్ లో మీకు ఇష్టమైన హీరో ఎవరు? అంటే తడుముకోకుండా విజయ్ దేవరకొండ పేరు చెప్పింది షాలినీపాండే. ‘అర్జున్ రెడ్డి’ సినిమాతో తెరకు పరిచయమై.. మంచి గుర్తింపు సంపాదించుకున్న ఈ హీరోయిన్ ఫేస్‌బుక్ లైవ్ లో మాట్లాడింది. నెల్లూరులో ఒక మొబైల్ స్టోర్ రిబ్బన్ కటింగ్ కు వెళ్లి అస్వస్థతకు గురి అయిన షాలినీ.. తన క్షేమ సమాచారాన్ని తెలియజేసింది. తనకు ఇప్పుడు బాగుందని తెలిపింది. అలాగే తను కొత్తగా సైన్ చేసిన సినిమాల వివరాలను కూడా పంచుకుంది.

తను ‘మహానటి’లో నటిస్తున్న విషయం నిజమే అని షాలినీ ధ్రువీకరించింది. ఆ సినిమాలో జమున పాత్రను షాలినీ చేయబోతోందని వార్తలు వస్తున్నాయి. ఆ సినిమాలో నటిస్తున్న విషయాన్ని షాలిని ధ్రువీకరించింది. అయితే అందులో తన పాత్ర ఏమిటో మాత్రం ఇప్పుడే చెప్పను అంది. అలాగే ‘100 పర్సెంట్ లవ్’ తమిళ వెర్షన్లో నటిస్తున్న విషయాన్ని కూడా ధ్రువీకరించింది ఈ జబల్‌పూర్ భామ.

ప్రస్తుతానికి తన మకాం ముంబైలోనే అని, హైదరాబాద్ కు షిఫ్ట్ అవుతానేమో.. అని వ్యాఖ్యానించింది. టాలీవుడ్ వరకూ మీకు ఇష్టమైన హీరో ఎవరంటే మాత్రం.. తన తొలి సినిమా హీరో విజయ్ పేరే చెప్పింది ఈ హీరోయిన్. మరికొన్ని సినిమాలకు కూడా ఓకే చెప్పాను అని వాటి వివరాలు త్వరలోనే ప్రకటిస్తానని చెప్పింది.