ఆర్జీవీతో అర్జున్ రెడ్డి పార్టీ చేసుకున్నాడు

విజయ్ దేవరకొండ నటించిన అర్జున్ రెడ్డి చిత్రం వివాదాల్లో చిక్కుకున్న మొట్టమొదటి రోజు నుంచి ఆ మూవీ యూనిట్‌కి అండగా నిలుస్తూ వచ్చాడు రాంగోపాల్ వర్మ. లిప్ లాక్ వివాదం మొదలుపెడితే, బూతు డైలాగ్స్ వరకు అన్ని వివాదాల్లోనూ అర్జున్ రెడ్డి సినిమాకి ఎంతో మద్దతు పలికాడు. అంతేకాకుండా విజయ్ దేవరకొండ పర్‌ఫార్మెన్స్‌ని కూడా ప్రశంసించి ప్రమోషన్స్ పరంగా ఆ సినిమాను మరో స్థాయికి చేర్చాడు వర్మ. అందుకేనేమో ఇటీవల ముంబై వెళ్లిన సందర్భంలోనే కొంత సమయం వెచ్చించి రాంగోపాల్ వర్మని కలిశాడు విజయ్ దేవరకొండ.

ఈ సందర్భంగానే రాంగోపాల్ వర్మతో కలిసి విజయ్ దేవరకొండ తీసుకున్న సెల్ఫీ ఒకటి సోషల్ మీడియాలో వైరల్ అవుతోంది. అర్జున్ రెడ్డి సినిమా వర్మ ఆలోచనలకి దగ్గరిగా వుండే చిత్రం. అందులోనూ తనపై వచ్చిన వివాదాలని హ్యాండిల్ చేయడంలోనూ ఎంతో ధైర్యం ప్రదర్శించాడు యువ నటుడు విజయ్ దేవరకొండ. ఈ ఇద్దరూ కలిసి సినిమా తీస్తే, అదెలా వుంటుందో చూడాలని సోషల్ మీడియాలో కామెంట్స్ పెడుతున్నారు విజయ్ దేవరకొండ ఫ్యాన్స్. ఆర్జీవీ తల్చుకోవాలే కానీ అదెంతసేపు చెప్పండి!!