‘మిడిల్ క్లాస్ మెలొడీస్’ ట్రైలర్: దరిద్రుడు దొడ్డికెళ్తే సముద్రం ఎండిపోయిందంట!

‘దొరసాని’ చిత్రంతో తెలుగు ప్రేక్షకులకు పరిచయమైన ఆనంద్ దేవరకొండ హీరోగా వస్తోన్న రెండో చిత్రం ‘మిడిల్ క్లాస్ మెలొడీస్’. వర్ష బొల్లమ్మ హీరోయిన్. ఫ్యామిలీ కామెడీ డ్రామాగా రూపొందిన ఈ చిత్రం నవంబర్ 20న అమెజాన్ ప్రైమ్ వీడియోలో విడుదలవుతోంది. అయితే, చిత్ర ప్రచారంలో భాగంగా ఈరోజు ట్రైలర్‌ను విడుదల చేశారు. ఈ ట్రైలర్‌ను విజయ్ దేవరకొండ, రష్మిక మందన ఆవిష్కరించారు. ట్రైలర్ చూస్తుంటే సినిమా మంచి ఎంటర్‌టైనర్ అని అర్థమవుతోంది.

తండ్రికి ఎప్పుడూ నష్టం చేకూరుస్తూ ఆయనతో తిట్లు తినే కొడుకు పాత్రలో ఆనంద్ దేవరకొండ నటించారు. గుంటూరు బ్యాక్‌డ్రాప్‌లో ఈ చిత్రం రూపొందింది. అంటే, గుంటూరు యాసలో ఈ సినిమా ఉంటుంది. ఇప్పటికే విడుదలైన గుంటూరు పాట విపరీతంగా ఆకట్టుకుంది. ఇప్పుడు ఈ ట్రైలర్ కూడా ఆకట్టుకుంటోంది. ముఖ్యంగా హీరో తండ్రి పాత్ర చాలా అట్రాక్టివ్‌గా ఉంది. అలాగే డైలాగులు కూడా చాలా బాగున్నాయి. ముఖ్యంగా ‘‘దరిద్రుడు దొడ్డికెళ్తే సముద్రం ఎండిపోయిందంట’’ అనే డైలాగు హీరో తండ్రి పాత్రలోని ఫస్ట్రేషన్‌‌కి, సినిమాలో ఉన్న కామెడీ డోస్‌కి అద్దం పడుతోంది.

Also Read: పుట్టినరోజు నాడు పవన్ కళ్యాణ్‌ను కలిసిన డైరెక్టర్ క్రిష్

కాగా, వినోద్ అనంతోజు దర్శకత్వం వహించిన ఈ సినిమాను భవ్య క్రియేషన్స్ బ్యానర్‌పై వి.ఆనంద్ ప్రసాద్ నిర్మించారు. జనార్ధన్ పసుమర్తి కథ, మాటలు అందించారు. స్వీకర్ అగస్తి స్వరాలు సమకూర్చారు. ఆర్‌హెచ్ విక్రమ్ నేపథ్య సంగీతం అందించారు. సన్నీ కూరపాటి సినిమాటోగ్రఫి అందించారు. రవితేజ గిరిజాల ఎడిటర్.