ఏఎన్నార్ పాత్రలో అర్జున్ రెడ్డి హీరో

పెళ్లి చూపులు సినిమాతో అందరి దృష్టిలో పడి, ఆ తర్వాత అర్జున్ రెడ్డి సినిమాతో సంచలనం సృష్టించిన విజయ్ దేవరకొండకు సావిత్రి బయోపిక్ సినిమా మహానటిలోనూ ఓ పాత్రను పోషించే అవకాశం లభించిందని మనం గతంలోనే చెప్పుకున్నాం. కానీ ఆ సినిమాలో అతడు సొంతం చేసుకున్నది మామూలు పాత్ర కాదని ఇప్పుడిప్పుడే తెలుస్తోంది. విజయ్ దేవరకొండ మహానటి సినిమాలో పోషించబోయే పాత్ర ఇంకెవరిదో కాదు.. తెలుగు సినిమా లెజెండ్స్‌లో ఒకరైన ఏఎన్నార్ పాత్రేనట. అయితే, దీనిపై ఇప్పటివరకు ఎక్కడా, ఎటువంటి అధికారిక ప్రకటన మాత్రం వెలువడలేదు.

పెళ్లిచూపులు, అర్జున్ రెడ్డి రెండు సినిమాల్లో విజయ్ దేవరకొండ పోషించింది నేటితరం సగటు యువకుడికి సంబంధించిన పాత్రలే. కేవలం ఈ రెండు సినిమాల అనుభవంతోనే అంత గొప్ప నటుడి పాత్రకు విజయ్ ఎలా న్యాయం చేయగలడు అనే అనుమానాలు వ్యక్తమవుతున్నాయి.

అయితే, 'అర్జున్ రెడ్డి'గా అతడిని చూసిన వాళ్లు మాత్రం ఈ వాదనను కొట్టిపారేస్తున్నారు. అంతేకాదు.. ఆ మాటకొస్తే, ఆ చిత్రాన్ని డైరెక్ట్ చేస్తోన్న దర్శకుడు నాగ్ అశ్విన్‌కి సైతం ఇది కేవలం రెండో సినిమానే కదా అని అనే వాళ్లూ లేకపోలేదు. ఏదేమైనా విజయ్ దేవరకొండ ఏఎన్నార్‌ని మైమరిపించగలడా లేదా అనేది మహానటి ఆడియెన్స్ ముందుకొస్తే కానీ తెలియదు.