‘అదిరింది’ మళ్లీ వాయిదా.. తలపట్టుకుంటున్న బయ్యర్లు

తమిళ స్టార్ హీరో, ఇళయదళపతి విజయ్ లేటెస్ట్ మూవీ ‘మెర్సల్’ను ‘అదిరింది’ పేరుతో డబ్బింగ్ చేసిన విషయం తెలిసిందే. తమిళనాట సూపర్‌హిట్ అయిన ఈ సినిమా తెలుగు విడుదలకు మాత్రం భాగ్యం కలగడంలేదు. బీజేపీ నేతల అభ్యంతరాలు, డాక్టర్ల నిరసనల మధ్య తమిళంలో భారీ వసూళ్లు సాధిస్తున్న ‘మెర్సల్’ సినిమా తెలుగునాట రిలీజ్ విషయంలో ఇబ్బందులు పడుతోంది.

తొలుత ‘మెర్సల్’తో పాటు తెలుగు వర్షన్‌ను కూడా ఈ నెల 18న రిలీజ్ చేయాలని భావించారు. తరువాత ఒక్క రోజు ఆలస్యంగా 19న సినిమా రిలీజ్ అవుతుందన్నా. చివరి నిముషంలో సెన్సార్ కార్యక్రమాలు పూర్తి కాలేదంటూ సినిమాను వాయిదా వేశారు. అప్పటి నుంచి త్వరలో వస్తోందని చెప్పారు తప్ప తేదీ వెల్లడించలేదు. ఎట్టకేలకు శుక్రవారం(అక్టోబర్ 27న) విడుదలచేస్తున్నట్టు బుధవారం ప్రకటించారు. జాతీయ స్థాయిలో వివాదాస్పదమైన ఈ సినిమాకు తెలుగులో కూడా మంచి హైప్ క్రియేట్ అయ్యింది. దీంతో మంచి ఓపెనింగ్స్ కూడా వచ్చే అవకాశం ఉందని భావించారు.

అయితే ఇప్పుడు మరోసారి ‘అదిరింది’ వాయిదా పడింది. ఈ మేరకు టాలీవుడ్‌లో పలు సినిమాలకు పీఆర్వోగా పనిచేస్తున్న వంశీ కాక ట్వీట్ చేశారు. ‘దళపతి విజయ్ అదిరింది మరోసారి వాయిదా పడింది. తెలుగు వర్షన్ బయ్యర్లు, నిర్మాతలకు ఇది బాధాకరమైన వార్త’ అని ట్వీట్ చేశారు. తమిళ నిర్మాతల ప్రకటన కోసం ‘అదిరింది’ టీం వెయిట్ చేస్తోందని పేర్కొన్నారు. ఇప్పటికే ఓపెనింగ్స్ కోసం భయపడుతున్న బయ్యర్లు.. మరోసారి వాయిదాతో తలపట్టుకుంటున్నారు. ‘మెర్సల్’ తెలుగు హక్కులను పవన్ కళ్యాణ్ సన్నిహితుడు శరద్ మరార్ కొనుగోలు చేసిన విషయం తెలిసిందే.
Thalapathy Vijay's #Adhirindhi release postponed once again. Very sad news for the Telugu version buyers & producers. pic.twitter.com/b5bAGdMvHC — Vamsi Kaka (@vamsikaka) October 26, 2017