విక్రమ్, సమంత ‘10’ సినిమా డిసెంబర్ 15న రిలీజ్!

ఆదరణ పెరుగుతుండటంతో దక్షణాది అగ్ర హీరోల సినిమాలను ఒకటి కంటే ఎక్కువ భాషల్లో విడుదల చేయడం ఇటీవల ఎక్కువైంది. కొంత మంది నిర్మాతలైతే.. గతంలో విడుదలైన సినిమాలను కూడా ఆయా భాషల్లోకి అనువాదం చేసి రిలీజ్ చేస్తున్నారు. ఇదే కోవలో రెండేళ్ల కిందట తమిళంలో విడుదలైన ఓ సినిమాను ఇప్పుడు తెలుగులో విడుదల చేస్తున్నారు. ‘10 ఎండ్రాదుకుల్లా’ అనే ఈ సినిమాలో విలక్షణ నటుడు విక్రమ్, సమంత ప్రధాన పాత్రలు పోషించడం విశేషం. వీరిద్దరికీ తెలుగులోనూ మంచి క్రేజ్ ఉండటంతో ఈ సినిమాను ‘10’ పేరుతో ఈ శుక్రవారం (డిసెంబర్ 15) తెలుగు రాష్ట్రాల్లో విడుదల చేస్తున్నారు.

తమిళంలో విజయ్ మిల్టన్ దర్శకత్వంలో తెరకెక్కిన ఈ సినిమా అక్కడ మంచి విజయాన్నే సొంతం చేసుకుంది. దీన్ని ‘10’ పేరుతో శ్రీ సుబ్రమణ్యేశ్వర సినీ క్రియేషన్స్ పతాకంపై జి.సుబ్రమణ్యం-ఎం.సుబ్బారెడ్డి-రామారావు చింతపల్లి సంయుక్తంగా తెలుగు ప్రేక్షకులకు అందిస్తున్నారు.

తెరపై విక్రమ్, సమంత జోడీని చూసేందుకు ప్రేక్షకులు ఆసక్తి చూపుతారని చిత్ర బృందం భావిస్తోంది. శాటిలైట్ బిజినెస్ కూడా కలిసొస్తుందని ఆశిస్తున్నారు. అయితే.. ఇప్పటివరకు ఈ సినిమాకు ఎలాంటి ప్రమోషన్స్ చేయకపోవడం గమనార్హం. మరి ఈ సినిమా తెలుగు ప్రేక్షకులను ఏ మేరకు ఆకట్టుకుంటుందో వేచి చూడాలి.