విలన్‌గా మారుతున్న విశాల్!

ఇప్పటివరకు తమిళ, తెలుగు భాషల్లో హీరోగా సినిమాలు చేసిన విశాల్ ఇక విలన్‌గా తన అదృష్టాన్ని పరీక్షించుకోబోతున్నాడు. ప్రస్తుతం తుప్పరివలన్, ఇరుంబు తిరై అనే రెండు తమిళ చిత్రాలు విశాల్ చేయబోయే చిత్రాల జాబితాలో వున్నాయి. ఇవిలావుండగా, కెరీర్‌లో మొదటిసారి ఓ మళయాళం సినిమాకి సైన్ చేసిన విశాల్ అందులో విలన్ పాత్ర పోషించనున్నాడు.

మళయాళం సూపర్ స్టార్ మోహన్ లాల్ హీరోగా తెరకెక్కనున్న ఈ సినిమా ద్వారా మొదటిసారిగా మన టాలీవుడ్ హీరో శ్రీకాంత్ కూడా ఓ ప్రధాన పాత్రతో మళయాళం సినిమాల్లోకి ఎంట్రీ ఇచ్చుకుంటున్నాడు. బి ఉన్నికృష్ణన్ డైరెక్ట్ చేయనున్న ఈ మల్టీస్టారర్ చిత్రాన్ని లింగా చిత్రం ఫేమ్ రాక్‌లైన్ వెంకటేష్ నిర్మిస్తున్నాడు.

ముగ్గురు మూడు వేర్వేరు భాషల నటులు నటిస్తున్న సినిమా కావడంతో ఈ సినిమా కూడా మళయాళం, తమిళ, తెలుగు భాషల్లో రిలీజ్ అవుతుందని ట్రేడ్ వర్గాలు భావిస్తున్నాయి. జూన్ నెల నుంచి విశాల్ ఈ సినిమా షూటింగ్‌లో పాల్గొననున్నాడు.