ట్రైలర్ టాక్: డిఫరెంట్ గెటప్‌లో డిటెక్టివ్ విశాల్

తెలుగు మాస్ అభిమానులు ఇష్టపడే తమిళ హీరోల్లో హీరో విశాల్‌ కూడా ఒకరు. గతంలో ఆయన నటించిన పందెంకోడి, పొగరు, భరణి చిత్రాలు తెలుగులోనూ మంచి వసూళ్లను రాబట్టాయి. అయితే ఎప్పుడూ మాస్‌ కమర్షియల్‌ జోనర్‌లోనే మూసదోరణితో సినిమాలు తీస్తుండటంతో ఈమధ్య కాలంలో ఈ హీరోని సరైన హిట్ పలకరించలేదు. అయితే ఇటీవల వైవిధ్యమైన కథలను ఎంచుకుని ప్రయోగాత్మక సినిమాలతో ప్రేక్షకుల ముందుకు వచ్చినా ఈ హీరోకి కలిసిరాలేదు. దీంతో మనోడు మరో కొత్త జోనర్‌లో ప్రేక్షకుల ముందుకు రాబోతున్నాడు. తమిళ దర్శకుడు మిస్కిన్.. సస్పెన్స్ థ్రిల్లర్‌గా తెరకెక్కించిన ‘తుప్పారివాలన్’ మూవీలో విశాల్ డిటెక్టివ్‌ అవతారంలో అదరగొట్టేస్తున్నాడు. సెప్టెంబర్ 14 న రిలీజ్ కానున్న ఈ మూవీ లేటెస్ట్ ట్రైలర్‌ను విడుదల చేసింది చిత్రయూనిట్.

రొటీన్ కథలకు భిన్నంగా.. వెరైటీ కాన్సెప్ట్‌తో వెరైటీ లుక్‌తో డిటెక్టివ్‌గా విశాల్ కొత్తగా కనిపిస్తున్నాడు. సీరియల్ హత్యల గుట్టువిప్పేందుకు పోలీసులకు సహకరించే డిటెక్టివ్ పాత్రలో కామెడీని రంగరించి పంచ్‌లు పేలుస్తున్నాడు విశాల్. యాక్షన్, థ్రిల్లర్, సస్పెన్స్, కామెడీ అన్నీ ఉన్న ఈ ట్రైలర్ హై టెక్నికల్ వాల్యూస్‌తో హై రేంజ్‌లో ఉంది. విశాల్ కెరియర్‌లోనే అత్యధిక బడ్జెట్‌తో ఈ మూవీని తెరకెక్కించారు. ఈ సినిమాలో విశాల్ పాటు ఆండ్రియా, ప్రసన్నలు నటిస్తుండగా భారీ అంచనాలతో ‘తుప్పారివాలన్’ గురువారం ప్రేక్షకుల ముందుకు రానుంది. అయితే ఈ సినిమాను ముందు తమిళంలో రిలీజ్ చేసి రిజల్ట్‌ను బట్టి తెలుగులో విడుదలచేసే అవకాశాలు ఉన్నాయి.