‘విశ్వరూపం 2’ మేకింగ్ వీడియో.. లోకనాయకుడు చాలా కష్టపడ్డారు!

లోకనాయకుడు కమల్‌ హాసన్‌ నటిస్తూ, దర్శకత్వం వహించిన చిత్రం ‘విశ్వరూపం 2’. ఐదేళ్ల క్రితం వచ్చి సంచలన విజయం సాధించిన ‘విశ్వరూపం’కు ఇది సీక్వెల్. ఆ సినిమా తరవాత సీక్వెల్‌ను ప్రకటించినా అది తెరపైకి రావడానికి ఇన్నేళ్లు పట్టింది. కారణాలు ఏమైనప్పటికీ ‘విశ్వరూపం 2’ ఆలస్యమవడంపై ప్రేక్షకులు ఒకింత అసహనానికి గురయ్యారు. ఇక ఆలస్యం చేయకూడదని భావించి కమల్ సినిమాను పూర్తి చేశారు. కమల్, ఆయన సోదరుడు చంద్రహాసన్ నిర్మించిన ఈ చిత్రం ఆగస్టు 10న ప్రేక్షకుల ముందుకు వస్తోంది. వాస్తవానికి ఈ చిత్రాన్ని పూర్తి చేయడానికి కమల్ చాలా కష్టపడ్డారని, ఎన్నో ఆర్థిక ఇబ్బందులు ఎదుర్కోవాల్సి వచ్చిందని సినీ వర్గాల సమాచారం.

అయితే తాజాగా విడుదల చేసిన ‘విశ్వరూపం 2’ మేకింగ్ వీడియో చూస్తుంటే కమల్ నిర్మాతగానే కాకుండా హీరోగానూ సినిమా కోసం చాలా కష్టపడ్డారని అర్థమవుతోంది. వయసు 60 ఏళ్లు దాటినా స్టంట్స్ కోసం కమల్ చాలా కష్టపడ్డారు. ఈ వీడియో మొత్తం కమల్ చేసిన స్టంట్స్‌నే పొందుపరిచారు. ఈ చిత్రంలో ఆండ్రియా, పూజా కుమార్ హీరోయిన్లుగా నటించారు. జిబ్రాన్ సంగీతం అందించారు. కాగా, మేకింగ్ వీడియోతో పాటు వర్కింగ్ స్టిల్స్ (Click Here) కూడా చిత్ర యూనిట్ విడుదల చేసింది.