MeToo: మహిళలపై కేఆర్‌కే వివాదాస్పద నిర్ణయం

ఓవైపు పని ప్రదేశాల్లో తము ఎదుర్కొన్న లైంగిక వేధింపులకు వ్యతిరేకంగా బాధిత మహిళలు, యువతులు ఒక్కొక్కరిగా బయటకు వస్తున్నారు. ఆరోపణలు ఎదుర్కుంటున్న వారిపై కేసులు సైతం నమోదు చేసి విచారణ చేస్తున్నారు. ఈ క్రమంలో తాను భార్యకు దాసుడ్ని అంటూ బాలీవుడ్ సినీ విమర్శకుడు కమల్ రషీద్ ఖాన్ వివాదాస్పద నిర్ణయం తీసుకున్నాడు. ఏకంగా తన ఆఫీసుల్లో పనిచేసే మొత్తం మహిళా ఉద్యోగులపై వేటు వేశాడు. ఈ మేరకు ఆయన ట్విటర్‌లో ఒక పోస్ట్‌ పోట్టాడు.

‘అవును. మీరు విన్నది నూటికి నూరుపాళ్లు నిజమే. నేను భార్యకు దాసుడ్ని. ఆమె నిర్ణయాన్ని అమలు చేశాను. భారత్, దుబాయ్‌లలోని నా కార్యాలయాలలో ప్రస్తుతం ఒక్క మహిళా ఉద్యోగి కూడా లేరు. ఇక నుంచి పార్టీలు లేవు. ఏ ఇతర మహిళతో మాట్లాడటం ఉండదు. #MeTooకు ధన్యవాదాలంటూ’ కేఆర్‌కే ట్వీట్ చేశాడు. తీవ్ర విమర్శలు రావడంతో ఆ ట్వీట్‌ను డిలీట్ చేశాడు.

కాగా, సినీ విమర్శకుడు కేఆర్‌కే నిర్ణయాన్ని పలువురు తప్పుపడుతున్నారు. ఓవైపు లైంగిక వేధింపుల బాధితులకు బాసటగా ఎందరో ముందుకొస్తుంటే.. ఇలాంటి పిచ్చి నిర్ణయం అవసరమా అని నెటిజన్లు ప్రశ్నిస్తున్నారు. అయితే మహిళలకు తగినన్ని అవకాశాలు కల్పించి మహిళా సాధికారతకు తోడ్పాడు అందించాల్సిన వ్యక్తి బాధ్యత మరిచి వ్యవహరిస్తున్నారని బాలీవుడ్ సైతం కోడై కూస్తోంది.
చదవండి: MeToo సంబంధిత కథనాల కోసం క్లిక్ చేయండి