‘బాహుబలి 2’లో తమన్నాను వెతుక్కోవాల్సిందే!

విడుదలకు కొన్ని రోజుల ముందు ‘బాహుబలి 2’ సినిమాను విపరీతంగా ప్రమోట్ చేశారు. ప్రమోషన్ కోసం చిత్ర బృందం వివిధ ప్రాంతాలకు వెళ్లింది. ఈ ప్రమోషన్స్‌లో రాజమౌళితో పాటు ప్రభాస్, రానా, అనుష్క మాత్రమే కనిపించారు. ‘బాహుబలి’లో అవంతికగా మెప్పించిన తమన్నా మాత్రం ఈ ప్రమోషన్స్‌లో కనిపించలేదు. టీవీ ఇంటర్వ్యూలలో సైతం తమన్నాకు చోటు లేకుండా పోయింది. దుబాయి టూర్‌ వెళ్లిన బాహుబలి బృందం కనీసం తమన్నాను కాంటాక్ట్ కూడా చేయలేదని సమాచారం.

‘బాహుబలి 2’లో తమన్నా పాత్రకు చాలా తక్కువ ప్రాధాన్యత ఉన్న కారణంతోనే ఆమె ప్రమోషన్స్‌కు రావడం లేదనే ప్రచారం కూడా జరిగింది. ‘బాహుబలి 2’ ట్రైలర్‌లో తమన్నాకు స్థానం లేకపోవడం, పోస్టర్స్‌లో కూడా ఆమెకు ప్రాధాన్యం ఇవ్వకపోవడంతో ఇక ఆమె రోల్ అంతంత మాత్రమే అన్న నిర్ణయానికి ప్రేక్షకులు వచ్చేశారు. అనుకున్నట్లుగానే సినిమాలో తమన్నా పాత్ర అసలు ఏమీ లేదు.

తమన్నా ఎప్పుడొస్తుందా..? అని ఆమె అభిమానులు ఎదురుచూడాల్సిన పరిస్థితి. సినిమా క్లైమాక్స్‌కి వచ్చినా.. ఆమె కనపడకపోవడం ఆశ్చర్యపరిచింది. ఒక్క క్లైమాక్స్ యుద్ధ సన్నివేశంలో మాత్రమే ఆమె కనిపించింది. సినిమా మొదటి భాగంలోనే తమన్నా పార్ట్ మొత్తం పూర్తవ్వడంతో ‘బాహుబలి 2’లో ఆమెకు చోటు లేకుండా పోయింది. కాకపోతే దక్షిణాన స్టార్ హీరోయిన్లలో ఒకరిగా ఉన్న తనకు కనీస కవరేజ్ అయినా ఇవ్వలేదంటూ తమన్నా తన సన్నిహితుల దగ్గర వాపోతుందట.