బిగ్‌బాస్ హోస్టు.. ఈ నలుగురు హీరోల్లో ఎవరు?

తెలుగులో బిగ్ బాస్ రియాలిటీ షో ఫస్ట్ ఎడిషన్ బ్రహ్మాండంగా సక్సెస్ అయ్యింది. తెలుగు టీవీ ప్రేక్షకులకు కూడా ఇలాంటి షోలు బాగానే కిక్ నిస్తాయని ఫస్ట్ ఎడిషన్తో స్పష్టం అయ్యింది. ఇప్పుడు బిగ్ బాస్ రెండో ఎడిషన్ కు సమయం దగ్గరపడుతోంది. తొలిసారితో పోలిస్తే రెండో సారి మరింత భారీ ఎత్తున ఈ ప్రోగ్రామ్ ను డిజైన్ చేయడానికి దీని రూపకర్తలు ప్రయత్నాలు చేస్తున్నారని సమాచారం. మరి రెండో ఎడిషన్ కు ఎన్టీఆర్ హోస్టుగా వ్యవహరిస్తాడా? లేదా? అనేది మాత్రం ఇంకా క్లారిటీ లేని అంశం.

ఈ విషయంలో ఎన్టీఆర్ ను పరిగణనలోకి తీసుకుంటూనే.. ఇదే సమయంలో.. ఇతర హీరోల కోసం కూడా ట్రై చేస్తున్నారనే టాక్ వినిపిస్తోంది. పారితోషకం, జనాల్లో క్రేజ్ వంటి అంశాలను పరిగణనలోకి తీసుకుని సంప్రదింపులు జరుపుతున్నట్టు సమాచారం.

ఫస్ట్ ఎడిషన్ హిట్ గా నిలిపిన తారక్ తో పాటు... అల్లు అర్జున్, నాని, దగ్గుబాటి రాణా లతో కూడా బిగ్ బాస్ సంప్రదింపులు జరుపుతున్నట్టుగా సమాచారం. వీరిలో ఎవరో ఒకరితో రెండో ఎడిషన్ ను చేయించాలని అనుకుంటున్నారట. అయితే.. ఈ హీరోలు భారీ ఎత్తున రెమ్యూనరేషన్ ను డిమాండ్ చేస్తున్నారనే మాట కూడా వినిపిస్తోంది. వీళ్లలో ఎన్టీఆర్, రాణాలు బుల్లితెరపై తమ సత్తా చాటారు. ఇక నాని, అల్లు అర్జున్ లు రాణించగలరు. ఎవరైనా ప్రోగ్రామ్ హిట్టే.. అయితే పారితోషకాల దగ్గరే చర్చలు జరుగుతున్నట్టుగా టాక్!