హోదాపై ప్రిన్స్ స్పందనేంటి?

వివాదాలకు చాలా దూరంగా ఉండే మహేష్ బాబు ఇప్పుడు ఓ వివాదం కారణంగా తరచూ వార్తల్లో నిలుస్తున్నారు. దాని కారణం ఆయన జల్లికట్టుకి మద్ధతుగా నిలవడమే.
తమిళులు జల్లికట్టుపై నిరసన వ్యక్తం చేస్తున్న తీరుపై మహేష్ స్పందించి తమిళుల సంప్రదాయ క్రీడైన జల్లికట్టు ఉండాల్సిందేదని తన అభిప్రాయాన్ని వ్యక్తం చేశారు. అప్పటికే కొందరు నెటిజన్లు మహేష్ స్పెషల్ స్టేటస్‌కు ఎందుకు మద్దతు ఇవ్వట్లేదు? ప్రత్యేకంగా తమిళులకు ఫేవర్‌గా నిలవడానికి మరే కారణమైనా ఉందా? అంటూ ఆయనకు యాంటీగా ట్వీట్స్ పెట్టారు.

తాజాగా పవన్ కల్యాణ్ ప్రత్యేక హోదా అంశం విషయంలో కేంద్రంపై ఒత్తిడి తీసుకురావడానికి జనవరి 26న వైజాగ్ బీచ్‌లో ఆంధ్రప్రదేశ్ యువతతో కలిసి మౌన నిరసన కార్యక్రమం చేపట్టాలని నిర్ణయించుకున్నారు. దీనికి మద్ధతుగా వరుణ్ తేజ్, సాయి ధరం తేజ్, సందీప్ కిషన్ ఇలా పలువురు సినీతారలు కూడా నిలిచారు.

అయితే ఇప్పుడు అందరి దృష్టి మహేష్‌పై పడింది. జల్లికట్టుకు మద్దతు తెలిపిన మహేష్ ఇప్పుడు మన కోసం జరగపోతున్న పోరాటానికి మద్దతు ఇవ్వరా? తన సొంత రాష్ట్రంపై జరుగుతోన్న అన్యాయాన్ని గురించి ప్రశ్నించరా? అనే ప్రశ్నలు వ్యక్తమవుతున్నాయి. మరి మహేష్ స్పెషల్ స్టేటస్‌కు మద్దతుగా నిలుస్తారో లేదో చూడాలి.