శ్రీదేవి మరణం..జాన్వీ కపూర్ బాధ్యత తీసుకున్న దర్శకుడు?

హీరోయిన్‌గా కూతురి కెరీర్ ఆరంభ దశలో ఉండగా.. భౌతికంగా దూరం అయ్యారు శ్రీదేవి. నటిగా దశాబ్దాల అనుభవం, అనేక సంవత్సరాల పాటు, వివిధ భాషల్లో స్టార్ హీరోయిన్ గా వెలుగొందిన చరిత్ర కలిగిన శ్రీదేవి తన కూతురి కెరీర్ కు గొప్ప గైడ్ అయ్యేది. తల్లిగా, స్టార్ నటిగా.. కూతురి కెరీర్ ను చక్కగా గాడిన పెట్టేది శ్రీదేవి. అయితే ఇప్పుడామె లేరు.

కూతురి తొలి సినిమా మేకింగ్ దశలో ఉండగానే, కూతురిని తొలిసారి తెరపై చూసుకోక ముందే.. ఆమె హఠాన్మరణం పాలయ్యారు. ఇక జాన్వీ కపూర్ గురించి బాలీవుడ్ లో అయినా, ఇతర సినీ పరిశ్రమల్లో అయినా ఉన్న క్రేజ్ అంతా ఇంతా కాదు. అచ్చం యంగ్ శ్రీదేవి వలె ఉన్న జాన్వీని తెరపై చూపడానికి మూవీ మేకర్లు పోటీ పడుతున్న పరిస్థితి.

ఈ నేపథ్యంలో ఆమెకు చక్కని గైడ్ అవసరం అయితే ఉంటుంది. ఈ బాధ్యతను తీసుకోవడానికి ముందుకొస్తున్నాడట బాలీవుడ్ మూవీ మేకర్ కరణ్ జొహార్. జాన్వీ తొలిసారి తెరపై కనిపించనున్న సినిమాకు నిర్మాతగా ఉన్నాడు కరణ్. ఒక మరాఠీ సినిమా ను హిందీలో రీమేక్ చేస్తూ జాన్వీని పెద్ద తెరకు పరిచయం చేస్తూ ఉన్నాడు కరణ్. ఈ సినిమా రూపకల్పన ద్వారానే కాకుండా.. తదుపరి సినిమాలు ఒప్పుకోవడం విషయంలో కూడా జాన్వీకి కరణ్ గైడ్ గా వ్యవహరించే అవకాశాలున్నాయని బాలీవుడ్ మీడియా అంటోంది. అయితే జాన్వీకపూర్ తండ్రి బోనీ కపూర్ కూడా బడా నిర్మాత అని వేరే చెప్పనక్కర్లేదు. వీళ్లందరూ ఉన్నా.. శ్రీదేవి లేని లోటు మాత్రం జాన్వీ పై ఉండవచ్చు.