చిరు రియాల్టీ షో‌పై యండమూరి సంచలన కామెంట్స్!

ఒకప్పుడు మంచి మిత్రులుగా మెలగిన మెగాస్టార్ చిరంజీవి, రచయిత యండమూరి వీరేంద్రనాథ్‌లకు ప్రస్తుతం ఏమాత్రం పొసగటం లేదు. గతంలో రామ్ చరణ్‌పై యండమూరి తీవ్ర వ్యాఖ్యలు చేయడం, దానికి నాగబాబు ఘాటుగా స్పందిచడం ఆ వివాదాం సద్దుమణిగింది. అయితే తాజాగా చిరంజీవినే లక్ష్యంగా చేసుకుని సంచలన వ్యాఖ్యలు చేశారు. చిరు వ్యాఖ్యాతగా వ్యవహరిస్తోన్న 'మీలో ఎవరు కోటీశ్వరుడు' టీవీ ప్రోగ్రామ్‌‌తో జనాల్ని దోచుకుంటున్నారని పరోక్షంగా యండమూరి అభివర్ణించాడు.

ఆ కార్యక్రమం అతి పెద్ద మోసమని ఆయన తీవ్ర ఆరోపణలు చేశారు. ఈ పోటీలో పాల్గోడానికి ముందు మూడు మెసేజ్ లు పంపాల్సి ఉంటుంది, ఒక్కో మెసేజ్‌కు రూ.5 ఛార్జ్ అవుతుందని చెప్పారు. అంటే, ఒక్కొక్కరు రూ.15 చెల్లిస్తారని, ఇలా 10 లక్షల మంది మెసేజ్‌లు పంపితే, నిర్వాహకులకు రూ. 1.5 కోట్లు దక్కుతాయని తెలిపారు. ఆ తర్వాత కుక్కలకు బిస్కెట్లు విసిరినట్లు పోటీల్లో పాల్గొన్నవారికి రూ.5 లక్షలు, రూ.6 లక్షలు పడేస్తారని మండిపడ్డారు. వాటిని మనం చొంగ కార్చుకుంటూ తీసుకుంటున్నామని యండమూరి విమర్శించారు.

నిరుపేదలు కూడా ఎంతో ఆశతో ఈ కార్యక్రమానికి మెసేజ్‌లు పంపుతున్నారని యండమూరి ఆవేదన వ్యక్తం చేశారు. ఇంతకంటే మోసం మరొకటి లేదని, దీని కంటే లాటరీ టికెట్ కొనుక్కోవడం ఉత్తమమని సలహా ఇచ్చారు. లాటరీలను బ్యాన్ చేసినట్టే, ఇలాంటి కార్యక్రమాలను కూడా ప్రభుత్వాలు నిషేధించాలని ఆయన డిమాండ్ చేశారు.