‘రంగస్థలం’ ఫస్ట్ సాంగ్: ఎంత సక్కగున్నవే సమంతా!!

వేరుశనగ కోసం మట్టిని తవ్వితే.. ఏకంగా తగిలిన లంకె బిందెలాగ ‘ఎంత సక్కగున్నావే... లచ్చిమీ’!! చింత చెట్టు ఎక్కి చిగురు కొయ్యబోతే చేతికి అందిని చందమామ లాగ ‘ఎంత సక్కగున్నావే... లచ్చిమీ’!!అంటూ ‘రంగస్థలం’ మూవీ తొలిపాటతో వచ్చేశాడు రాక్ స్టార్ దేవిశ్రీ ప్రసాద్. ఆయన స్వరపరిచిన ‘రంగస్థలం’ మూవీ ఫస్ట్‌ సాంగ్ ‘ఎంత సక్కగున్నావే’ సాంగ్‌ను కొద్దిసేపటి క్రితం ట్విట్టర్ ద్వారా విడుదల చేశారు. చంద్రబోస్ అద్భుతమైన లిరిక్స్ అందించగా.. దేవిశ్రీ ప్రసాద్ ఆలపించారు.

‘ఎంత సక్కగున్నావే... లచ్చిమీ’అంటూ మొదలైన ఈ లిరికల్ సాంగ్‌లో సమంత రామలక్ష్మిగా క్యూట్ క్యూట్ లుక్స్‌తో అదరగొట్టేస్తుంది. ఇందులో సమంత చెరకు గెడల మోపును మోస్తూ వయ్యారంగా నడుస్తుంటే.. రామ్ చరణ్ సిగ్గుతో మొగ్గలేస్తున్నాడు. గేదెలను కడుగుతూ, నీళ్ల బిందెను నడుపై పెట్టుకుని వయ్యారాలు ఒలకబోసే స్టిల్స్ ఈ సాంగ్‌లో ఆకర్షణగా నిలిచాయి.

ఈ చిత్రాన్ని 1985 కాలం నాటి గ్రామీణ నేపథ్యంలో ప్రేమకథా చిత్రంగా దర్శకుడు సుకుమార్ తెరకెక్కించారు. జగపతిబాబు, ఆది, అనసూయ కీలకపాత్రలు పోషిస్తున్నారు. మైత్రి మూవీ మేకర్స్ బ్యానర్‌పై నవీన్ ఎరినేని, రవిశంకర్ ఎరినేని, మోహన్ చెరుకూరి అత్యంత ప్రతిష్టాత్మకంగా నిర్మిస్తున్న ఈ చిత్రం మార్చి 30న ప్రపంచ వ్యాప్తంగా విడుదలకు సిద్ధమవుతోంది.