పవన్ కళ్యాణ్‌తో బంపరాఫర్ కొట్టిన పునర్నవి.. దేవదాసిగా సాహసం!

ప్రస్తుతానికి గాసిప్ గానే ఉన్న ఈ వార్త నిజం కావాలి కాని.. బిగ్ బాస్ బ్యూటీ పునర్నవి పంట పండినట్టే. పవర్ స్టార్ పవన్ కళ్యాణ్ (Pawan Kalyan) సినిమాలో నటించడం అనేది చాలామంది హీరోయిన్ల కల.. అయితే పూర్తి స్థాయిలో హీరోయిన్ కాలేకపోయిన పునర్నవి (Punarnavi Bhupalam).. పవన్ కళ్యాణ్‌తో స్క్రీన్ షేర్ చేసుకోవడం అంటే బంపర్ ఆఫర్ గానే పరిగణించాలి. అజ్ఞాతవాసి సినిమా తరువాత పవన్ కళ్యాణ్ సినిమాలు చేయడం మానేయడం.. రాజకీయాల్లో ఫుల్ టైం పొలిటీషియన్‌గా మారడం.. తిరిగి ఎన్నికల తరువాత ఆర్థికపరమైన ఇబ్బందులున్నాయంటూ సినిమాల్లోకి రావడంతో పవన్ కళ్యాణ్ రీ ఎంట్రీ సినిమాల కోసం అభిమానులు ఎంతో ఆసక్తిగా ఎదురుచూస్తున్నారు.

అయితే పవన్ కళ్యాణ్ సినిమాలో ఛాన్స్ కొట్టిందట పునర్నవి. ప్రస్తుతం పవన్ కళ్యాణ్ పింక్ రీమేక్ ‘వకీల్ సాబ్’తో ప్రేక్షకుల ముందుకు వస్తున్నారు. ఈ చిత్రం తరువాత పవన్ కళ్యాణ్.. క్రిష్ (Krish Jagarlamudi) దర్శకత్వంలో మరో సినిమాకి గ్రీన్ సిగ్నల్ ఇచ్చేశారు. 1870 నాటి పరిస్థితుల నేపథ్యంలో పీరియాడిక్ డ్రామాగా క్రిష్ అద్భుత కథను రెడీ చేసినట్టు తెలుస్తోంది. ఈ సినిమాలో రాబిన్ హుడ్ తరహా పాత్రలో పవన్ కళ్యాణ్ కనిపించనుండగా.. ఈ చిత్రానికి ‘విరూపాక్ష’ అనే పవర్ ఫుల్ టైటిల్ ప్రచారంలో ఉంది. ఇక ఈ సినిమాలో పవన్‌కి జోడీగా బాలీవుడ్ హాట్ బ్యూటీ జాక్వెలిన్ ఫెర్నాండెజ్‌ నటించనుంది.

అయితే ఈ సినిమాలో 1870 నాటి పరిస్థితుల్ని ఆవిష్కరిస్తూ.. అప్పట్లో ఆచరణలో ఉన్న దేవదాసి వ్యవస్థను ఈ సినిమాలో చూపించబోతున్నారట క్రిష్. అయితే ఈ దేవదాసి పాత్ర కోసం బిగ్ బాస్ బ్యూటీ పునర్నవిని తీసుకున్నట్టు తీసుకున్నట్టు తెలుస్తోంది. ఈ సినిమాలో పునర్నవి పాత్రకు మంచి ప్రాధాన్యత ఉండటంతో వెంటనే ఓకే చెప్పేసిందట. అయితే పునర్నవి కాని.. చిత్ర యూనిట్‌ కాని దీన్ని దృవీకరించలేదు కాని.. పవన్ సినిమాలో పునర్నవి అనే వార్త వైరల్ అవుతోంది.

దేవదాసి పాత్ర అంటే ఛాలెంజింగ్ రోల్ అన్నమాటే.. ఎందుకంటే.. దక్షణ భారతదేశంలో ఈ దేవదాసి వ్యవస్థను ఓ సాంఘిక దురాచారంగా పరిగణిస్తారు. స్వాములు వివాహేతర లైంగికవాంఛలను తీర్చడం కోసం, పూజారులకు లైంగిక సంతృప్తి చేకూర్చడం కోసం ఏర్పడ్డ సామాజిక దురాచారమే ఈ దేవదాసి. భారతదేశంలో ఒక్క కేరళలో తప్ప అన్ని రాష్ట్రాలలో ఈ దేవదాసీలు వివిధ రూపాలుగా ఉంటారు. గుడి లోని దేవుడి ఉత్సవాలలో నాట్య సేవ చేస్తూ జీవితాంతం అవివాహిత గానే ఉండే స్త్రీగా కూడా ఈ దేవదాసిలు ఉంటారు. దేవతలకు నరబలికి బదులుగా దేవాలయాలకు అమ్మాయిలను సమర్పించే దురాచారంగా కూడా ఈ దేవదాసి వ్యవస్థ చరిత్రలో ఉంది. మరి క్రిష్ వీటిలో ఏ కోణాన్ని తీసుకుని పునర్నవిని దేవదాసిగా చూపిస్తారో చూడాలి.