Chiranjeevi: బింబిసార డైరెక్టర్‌తో చిరంజీవి నెక్స్ట్.. స్టోరీ లైన్‌కు ఫిదా!

‘వాల్తేర్ వీరయ్య’ వంటి బ్లాక్ బస్టర్ హిట్‌తో 2023ను ప్రారంభించారు మెగాస్టార్ చిరంజీవి (Megastar Chiranjeevi). ఆ విజయం ఇచ్చిన ఉత్సాహంతో ఇప్పుడు ‘భోలా శంకర్’ (Bhola Shankar) చిత్ర షూటింగ్‌లో పాల్గొంటున్నారు. తమిళ్‌లో అజిత్ నటించిన ‘వేదాళం’ చిత్రానికి ఇది రీమేక్ కాగా.. మెహర్ రమేష్ దర్శకత్వం వహిస్తున్నారు. అనిల్ సుంకర నిర్మిస్తున్న ఈ మూవీలో తమన్నా కథానాయిక. మహానటి ఫేమ్ కీర్తి సురేష్ చిరంజీవికి చెల్లెలిగా నటిస్తోంది. ఇప్పటికే మెజారిటీ షూటింగ్ పూర్తి చేసుకోగా.. ఆగస్టులో 11న విడుదల చేసేందుకు మేకర్స్ ప్లాన్ చేస్తున్నారు. ఇదిలా ఉంటే, చిరంజీవి నెక్స్ట్ మూవీ గురించి అప్‌డేట్ వచ్చేసింది. గతేడాది మొదటి సినిమాతోనే బ్లాక్ బస్టర్ హిట్ కొట్టిన యంగ్ డైరెక్టర్‌కు చిరు చాన్స్ ఇచ్చినట్లు సమాచారం.నందమూరి కళ్యాణ్ రామ్‌తో (Kalyan Ram) ‘బింబిసార’ (Bimbisara) వంటి భారీ హిట్ చిత్రాన్ని తీసిన మల్లిడి వశిష్ట్‌తో (Mallidi Vassishta ) చిరంజీవి సినిమా చేయనున్నారని తెలుస్తోంది. కళ్యాణ్‌రామ్‌తో వశిష్ట్ చేసిన ఫాంటసీ చిత్రం విమర్శకుల ప్రశంసలు అందుకోవడమే కాక ప్రేక్షకుల మనసులు గెలుచుకుంది. అయితే ఫస్ట్ అటెంప్ట్‌లోనే ఇంతటి భారీ బడ్జెట్ చిత్రాన్ని వశిష్ట్ అనుభవమున్న దర్శకుడిలా చేయడం ఇండస్ట్రీ వర్గాల దృష్టిని ఆకర్షించింది. ఈ క్రమంలోనే అతని నెక్ట్స్ మూవీపై బజ్ నెలకొనగా.. సూపర్ స్టార్ రజనీకాంత్‌, రామ్ చరణ్ లేదా బాలకృష్ణ సినిమా డైరెక్ట్ చేయబోతున్నాడని వార్తలు వినిపించాయి. కానీ ఫైనల్‌గా మెగాస్టార్ చిరంజీవితో జతకట్టబోతున్నట్లు తెలుస్తోంది.

బింబిసార మూవీని వశిష్ట్ తెరకెక్కించిన విధానం చిరంజీవిని ఆకట్టుకుంది. అంతేకాకుండా రీసెంట్‌గా వశిష్ట్ చెప్పిన స్టోరీ లైన్‌ చిరంజీవికి బాగా నచ్చడంతో వెంటనే గ్రీన్ సిగ్నల్ ఇచ్చారట. కాగా.. ‘భోళా శంకర్’ తర్వాత సెట్స్ పైకి వెళ్లనున్న ఈ సినిమాను యూవీ క్రియేషన్స్‌ సంస్థ అత్యంత భారీ బడ్జెట్‌తో నిర్మించనుందని టాక్. ప్రస్తుం ప్రీ ప్రొడక్షన్ పనులు జరుగుతున్నట్లు ఇండస్ట్రీ వర్గాల్లో టాక్ వినిపిస్తోంది.

ఇదిలా ఉంటే, RRR తర్వాత గ్లోబల్ స్టార్ ఇమేజ్ పొందిన మెగా పవర్ స్టార్ రామ్ చరణ్‌తో కూడా వశిష్ట్ సినిమా ఉండబోతుందట. యూవీ క్రియేషన్స్ నిర్మించే ఈ ప్రాజెక్ట్ టేకాఫ్ అయ్యేందుకు టైమ్ పట్టే అవకాశం ఉంది. ప్రస్తుతం చరణ్.. శంకర్‌ దర్శకత్వంలో ‘గేమ్ ఛేంజర్’ సినిమాలో నటిస్తున్నాడు. ఆ తర్వాత బుచ్చిబాబు డైరెక్షన్‌లో మరొక సినిమాకు కమిట్ అయ్యాడు. ఈ రెండు పూర్తయిన తర్వాతే మరో ప్రాజెక్ట్‌పై కాన్సంట్రేట్ చేసే అవకాశం ఉంది.

• Read latest Tollywood updates and Telugu News