బెల్లంకొండ‌కు షాక్ ఇచ్చిన నిధి అగర్వాల్!

ఇస్మార్ట్ బ్యూటీ నిధి అగర్వాల్ గురించి పరిచయం అవసరంలేదు. హైదరాబాద్‌లో పుట్టి పెరిగి ముంబైలో సెటిల్ అయిన ఈ మోడల్.. బాలీవుడ్ మూవీ ‘మున్నా మైఖేల్’తో వెండితెరకు పరిచయమైంది. తొలి సినిమాలోనే టైగర్ ష్రాఫ్ పక్కన ఆడిపాడి అందరి దృష్టిని ఆకర్షించింది. ఆ తరవాత 2018లో నాగచైతన్య ‘సవ్యసాచి’ సినిమా ద్వారా టాలీవుడ్‌కు పరిచయమైంది. ఈ సినిమా పెద్దగా ఆడకపోయినా నిధి అగర్వాల్‌కు మంచి గుర్తింపు వచ్చింది. డాన్సులు ఇరగదీస్తుందని అంతా ప్రశంసించారు. ఈ సినిమా తరవాత ‘మిస్టర్ మజ్ను’ సినిమాలో నటించినా కలిసిరాలేదు.

అయితే, కిందటేడాది పూరి జగన్నాథ్ దర్శకత్వంలో వచ్చిన ‘ఇస్మార్ట్ శంకర్’ సినిమాతో నిధి హిట్ అందుకుంది. ఈ సినిమాలో ఓ రేంజ్‌లో అందాలు ఆరబోసి కుర్రకారును కట్టిపడేసింది. తన కెరీర్లో ఐటమ్ సాంగ్స్ చేయనని చెప్పిన నిధి.. ‘‘జిల్లేలమ్మా జిట్టా’’ సాంగ్‌లో దుమ్ముదులిపి ఐటమ్ గర్ల్ కన్నా ఎక్కువ ఇమేజ్‌ను సొంతం చేసుకుంది. ఈ సినిమా తరవాత నిధిని అందరూ ఇస్మార్ట్ గర్ల్ అని పిలవడం మొదలుపెట్టారు. ఇదిలా ఉంటే, తాజాగా నిధి అగర్వాల్‌ను బెల్లంకొండ శ్రీనివాస్ సినిమాలో ఐటమ్ సాంగ్ కోసం సంప్రదించారట. అయితే, రెమ్యునరేషన్‌తో నిర్మాతలకు నిధి షాక్ ఇచ్చిందట.

Also Read: పవన్ కోసం 40 రోజులు కేటాయించిన జాక్వెలిన్!

బెల్లంకొండ శ్రీనివాస్ ప్రస్తుతం ‘‘అల్లుడు అదుర్స్’’ అనే సినిమాను చేస్తున్నాడు. సంతోష్ శ్రీ‌నివాస్ దర్శకత్వం వహిస్తున్నారు. సుమంత్ మూవీ ప్రొడ‌క్షన్స్ బ్యానర్‌పై సుబ్రహ్మణ్యం గొర్రెల నిర్మిస్తున్నారు. దేవీశ్రీ ప్రసాద్ సంగీతం సమకూరుస్తున్నారు. న‌భా న‌టేష్‌, అను ఇమ్మాన్యుయేల్‌ హీరోయిన్లు. బెల్లంకొండ శ్రీనివాస్ సినిమా అంటే హీరోయిన్లు, స్పెషల్ సాంగ్స్‌లో నర్తించే నటీమణుల విషయంలో వెనకడుగు వేయరు. అందుకే, ఈ సినిమాలో ప్రత్యేక గీతం కోసం నిధి అగర్వాల్‌ను సంప్రదించారట దర్శక, నిర్మాతలు. అయితే, ఒక్క సాంగ్ కోసం ఏకంగా రూ.60 లక్షలు డిమాండ్ చేసిందట నిధి. దీంతో షాకైన నిర్మాతలు మరో హీరోయిన్ కోసం వేట మొదలెట్టారట.