విసిగిపోయి తానే హీరోగా మారుతోన్న RX 100 దర్శకుడు!

ఇండస్ట్రీకి అస్సలు పరిచయంలేని కొత్త హీరో, హీరోయిన్‌తో సినిమా తీసి బ్లాక్ బస్టర్ హిట్ అందుకున్న యంగ్ అండ్ టాలెంటెడ్ డైరెక్టర్ అజయ్ భూపతి. RX 100 బ్లాక్ బస్టర్ కావడంతో అజయ్ భూపతికి అవకాశాలు పెరుగుతాయని, కచ్చితంగా స్టార్ హీరోతో సినిమా చేస్తాడని అంతా అనుకున్నారు. అనుకున్నట్టే ఆయన ‘మహాసముద్రం’ స్క్రిప్ట్‌తో రెడీ అయిపోయారు. ఆ కథను పట్టుకుని హీరోల వద్దకు వెళ్లారు. కానీ, ఎక్కడికెళ్లినా కథ విని నో అని చెబుతున్నారు.

ఈ స్క్రిప్టును పట్టుకుని మొత్తం ఐదుగురు హీరోల వద్దకు అజయ్ వెళ్లినట్టు విశ్వసనీయ సమాచారం. చివరిగా ఆయన రవితేజ వద్దకు వెళ్లారు. ఆయన కూడా స్టోరీ లైన్ విని చాలా బాగుందని చెప్పారట. స్టోరీ లైన్ విని బాగుందని చెప్పడంతో రవితేజ తన సినిమాను ఒప్పేసుకున్నట్టేనని అజయ్ భావించారట.

కానీ, కంప్లీట్ స్క్రిప్ట్ రెడీ చేయమని అజయ్‌కు రవితేజ చెప్పారట. అయితే, కథ గురించి భయపడొద్దని, తనపై నమ్మకముంచని అజయ్ సూచించారట. దీనికి అంగీకరించని రవితేజ.. పూర్తి స్క్రిప్ట్ సిద్ధం చేసి తనకు వినిపిస్తే తప్ప తాను సినిమా చేయనని రవితేజ తేల్చి చెప్పారని సమాచారం.

Also Read: నరేష్ vs రాజశేఖర్.. ‘మా’లో మళ్లీ ముసలం!

రవితేజ విషయంలో బాగా హర్ట్ అయిన అజయ్ భూపతి.. ‘చీప్ స్టార్’ అంటూ పరోక్షంగా ట్వీట్ కూడా చేశారు. దీంతో ఆయనపై నెగిటివ్ ఇంపాక్ట్‌ పడిపోయింది. సాధారణంగా ఆయన కొంచెం అగ్రెసివ్. RX 100 సమయంలో కూడా విమర్శకులపై కాస్త ఘాటుగా, వెటకారంగా కామెంట్లు చేశారు. ఇప్పుడు, ఒక హీరోను ఉద్దేశించి ఇలా పరోక్షంగా ‘చీప్ స్టార్’ అంటూ ట్వీట్ చేయడం చాలా మందికి ఆగ్రహం తెప్పించింది.

ఈ పరిణామాలన్నిటితో విసిగిపోయిన అజయ్ భూపతి ఇక ఈ స్క్రిప్ట్ పట్టుకుని ఏ హీరో వద్దకు వెళ్లకూడదని డిసైడ్ అయిపోయారట. తానే హీరోగా మారాలని నిర్ణయించుకున్నారని తెలిసింది. మూడు నెలలపాటు జిమ్‌కు వెళ్లి హీరో పాత్రకు తగ్గట్టుగా తన బాడీని అజయ్ షేప్ చేయనున్నారట. సొంత దర్శకత్వంలో తనను తాను హీరోగా లాంచ్ చేసుకోవడానికి అజయ్ సిద్ధపడుతున్నారట.

అజయ్‌తో సినిమా చేయడానికి చాలా మంది నిర్మాతలు సిద్ధంగా ఉన్నట్టు సమాచారం. అజయ్‌పై నమ్మకంతో రూ.8 నుంచి రూ. 9 కోట్లు ఖర్చుపెట్టడానికి కూడా సిద్ధంగా ఉన్నారని ఇండస్ట్రీ టాక్. ప్రస్తుతానికి ఇండస్ట్రీ నుంచి వస్తోన్న టాక్ అయితే ఇది. అధికారిక ప్రకటన వస్తే తప్ప ఈ వార్తలో నిజమెంతో తెలీదు.