Shaakuntalam Movie రిలీజ్ డేట్ వాయిదా.. ఇది రెండో సారి

సీనియర్ హీరోయిన్ సమంత రౌతు ప్రభు లీడ్ (Samantha Ruth Prabhu) రోల్ పోషించిన శాకుంతలం (Shaakuntalam) మూవీ రిలీజ్ మరోసారి వాయిదాపడినట్లు వార్తలు వస్తున్నాయి. గుణ శేఖర్ దర్శకత్వంలో తెరకెక్కిన ఈ మూవీని ఫిబ్రవరి 17న వరల్డ్‌ వైడ్‌గా రిలీజ్ చేయబోతున్నట్లు ఇటీవల చిత్ర యూనిట్ ప్రకటించింది. ఈ మేరకు టీజర్‌ని కూడా రిలీజ్ చేశారు. ఫిబ్రవరి ఫస్ట్ నుంచి ప్రమోషన్స్‌ని కూడా స్టార్ట్ చేసేందుకు ఏర్పాట్లు చేస్తున్నారని.. సమంత కూడా ఈ ప్రచార కార్యక్రమాలకి హాజరవుతున్నట్లు కూడా వార్తలు వచ్చాయి. కానీ.. శాకుంతలం మూవీ పోస్ట్ ప్రొడక్షన్ వర్క్ ఇంకా కాస్త పెండింగ్‌లో ఉందని.. అందుకే రిలీజ్‌ని మరి కొన్ని రోజులు వాయిదా వేయాలని చిత్ర యూనిట్ భావిస్తోందట. అయితే.. ఈ రిలీజ్‌ వాయిదాపై ఇంకా అధికారిక ప్రకటన రాలేదు. కానీ.. గత ఏడాది కూడా సరిగ్గా ఇలానే శాకుంతలం రిలీజ్ డేట్‌ని వాయిదా వేశారు. వాస్తవానికి శాకుంతలం మూవీ గత ఏడాది నవంబరు 4న విడుదల కావాల్సి ఉంది. కానీ.. అప్పట్లో 3D వెర్షన్‌లో మూవీని తీసుకొచ్చేందుకు ప్లాన్ చేస్తున్నామని.. దాంతో విడుదలకి మరి కాస్త సమయం పడుతుందని చిత్ర యూనిట్ చెప్పుకొచ్చింది.

కానీ.. ఆశ్చర్యకరమైన విషయం ఏంటంటే? సమంత లీడ్ రోల్ పోషించిన యశోద మూవీ గత ఏడాది నవంబరు 11న పాన్ ఇండియా మూవీగా రిలీజైంది. విడుదలైన అన్ని భాషల్లో హిట్‌గా నిలిచి ప్రొడ్యూసర్‌కి లాభాల్ని తెచ్చిపెట్టింది. అయితే.. యశోద మూవీ రిలీజ్‌కి ముందు సమంత తాను మయోసైటిస్ అనే దీర్ఘకాలిక కండరాల సంబంధిత వ్యాధితో బాధపడుతున్నట్లు చెప్పింది. ఆ తర్వాత కొన్నాళ్ల పాటు పబ్లిక్‌కి దూరంగా ఉండిపోయింది. అయితే.. ఇటీవల ఆమె మళ్లీ శాకుంతలం ట్రైలర్ రిలీజ్ ఈవెంట్‌లో కనిపించింది. అప్పుడే శాకుంతలం మూవీని ఫిబ్రవరి 17న రిలీజ్ చేయబోతున్నట్లు కూడా డైరెక్టర్ గుణ శేఖర్ ప్రకటించారు.

కానీ.. ట్రైలర్‌లో చూపించిన గ్రాఫిక్స్ నాసిరకంగా ఉన్నాయని విమర్శించిన కొంత మంది నెటిజన్లు.. వీఎఫ్‌ఎక్స్‌పై కూడా పెదవి విరిచారు. గతంలో గుణశేఖర్ దర్శకత్వంలో వచ్చిన ‘రుద్రమదేవి’ మూవీలోని గ్రాఫిక్స్ కూడా అప్పట్లో ప్రేక్షకుల్ని నిరాశపరిచాయి. దాంతో శాకుంతలం మూవీలో వీఎఫ్‌ఎక్స్‌కి మరింత మెరుగులు దిద్దుతున్నట్లు తెలుస్తోంది. ఈ కారణంగానే సినిమాని కొన్ని రోజుల పాటు వాయిదా వేయబోతున్నట్లు వార్తలు వస్తున్నాయి.

Read Latest Telugu Movies News , Telugu News