Bheemla Nayak: సినిమా నుంచి మరో ఆసక్తికర అప్‌డేట్.. రానా భార్యగా మలయాళ నటి

తెలుగు ఇండస్ట్రీలో విభిన్నమైన కథాకథనంతో సినిమాలు తీసే హీరోల్లో హీరో రానా దగ్గుబాటి ఒకరు. స్టార్ ఫ్యామిలీ నుంచి హీరోగా పరిచయం అయినప్పటికీ.. కేవలం కమర్షియల్ చిత్రాలకే పరిమితం కాకుండా.. ప్రయోగాత్మక సినిమాలు చేయడంలో ఆయన ఎప్పుడూ ముందుకు ఉంటారు. ఇక ‘బాహుబలి’ సిరీస్‌లో ఆయన నటించిన ‘భళ్లాలదేవ’ పాత్ర ఇండస్ట్రీలో చిరస్థాయిలో నిలిచిపోతుంది అనడంలో ఎలాంటి అతిశయోక్తి లేదు. ఈ సినిమా తర్వాత ప్రభాస్‌కు ఎంత క్రేజ్ వచ్చిందో రానాకు అంతే క్రేజ్ వచ్చింది.

ఇక ఆ తర్వాత పాత్ర నచ్చితే చాలు.. ఆ సినిమా చేస్తూ ముందుకు వెళ్తున్నారు రానా. అలా రానా ప్రస్తుతం చేస్తున్న సినిమాల్లో మలయాళంలో సూపర్‌హిట్ సాధించిన ‘అయ్యప్పనుమ్ కోశియమ్’ రీమేక్ ఒకటి. తెలుగులో ‘భీమ్లా నాయక్’ అనే టైటిల్‌తో రూపొందుతున్న ఈ సినిమాలో పవర్‌స్టార్ పవన్‌కళ్యాణ్ మరో ప్రధాన పాత్రలో నటిస్తున్నారు. అయితే ఈ సినిమా నుంచి పవన్ పాత్రకు సంబంధించిన అప్‌డేట్స్ వచ్చాయి కానీ, రానా పాత్రకు సంబంధించి ఎలాంటి అప్‌డేట్స్ ఇప్పటివరకూ రాలేదు. అయితే ఈ నెల 20వ తేదీన రానా నటిస్తున్న ‘డెనియల్ శేఖర్ పాత్రను పరిచయం చేస్తూ.. ఓ బ్లిట్జ్స్ విడుదల చేస్తామని చిత్ర యూనిట్ ప్రకటించింది.

ఈ నేపథ్యంలో మరో వార్త సోషల్‌మీడియాలో వైరల్ అవుతోంది. అదేంటంటే ఈ సినిమాలో రానా సరసన హీరోయిన్‌గా మలయాళ నటి సంయుక్త మీనన్ నటిస్తోందనే వార్త ప్రస్తుతం వినిపిస్తోంది. గతంలో ఈ పాత్రలో తమిళ నటి ఐశ్వర్య రాజేష్ నటిస్తోందని వార్తలు వచ్చాయి. కానీ, ఇప్పుడు అది కాస్త మారిపోయి సంయుక్త పేరు వినిపిస్తోంది. దీనిపై త్వరలోనే క్లారిటీ వచ్చే అవకాశం ఉంది. ఇక సినిమా విషయానికొస్తే.. సాగరే కే చంద్ర దర్శకత్వంలో రూపొందుతున్న ఈ సినిమాని సితార ఎంటర్‌టైన్‌మెంట్స్ బ్యానర్‌పై రూపొందిస్తున్నారు. థమన్ సంగీతం అందిస్తున్న ఈ సినిమా వచ్చే ఏడాది సంక్రాంతి కానుకగా విడుదల కానుంది.