33 ఏళ్ల నిరీక్షణకు తెర.. కలల హీరోను కలిసిన ఖుష్బూ!

సౌతిండియా సినీ ఇండస్ట్రీలో ఒకప్పుడు అగ్ర తారగా వెలుగొందిన బబ్లీ హీరోయిన్.. ఖుష్బూ. ఆమెకు అభిమానుల్లో ఉన్న క్రేజ్‌ అంతా ఇంతా కాదు. తమిళనాడులో ఆమె కోసం ఏకంగా గుడి కట్టించి, పూజలు చేసిన విషయం తెలిసిందే. అంతేకాదు ఆమెపై అభిమానంతో ఇడ్లీలు, చీరలు.. ఇలా చాలావాటికి ఖుష్బూ పేరు పెట్టుకున్నారు. అభిమానులు అంత ప్రేమతో ఖష్బూను ఆరాధిస్తుంటే.. ఆమె మాత్రం మరో వ్యక్తిని ఆరాధించిందట. ఆ కలల హీరోను కలవడానికి ఏకంగా ఆమె 33 ఏళ్లు నిరీక్షించిందట. ఇంతకీ ఆయన ఎవరో కాదు.. ఒకప్పటి స్టైలిష్ బ్యాట్స్‌మన్, ప్రస్తుత టీమిండియా కోచ్‌ రవిశాస్త్రి.

అవును రవిశాస్త్రి అంటే ఖుష్బూకు వల్లమాలిన అభిమానమట. సోమవారం (సెప్టెంబర్ 18) ఆమె చెన్నైలో రవిశాస్త్రిని కలిసింది. ఆదివారం జరిగిన ఇండియా - ఆస్ట్రేలియా తొలి వడ్డే కోసం టీమిండియా జట్టుతో పాటు రవిశాస్త్రి చెన్నై వచ్చిన విషయం తెలిసిందే.

ఈ సందర్భంగా రవిశాస్త్రితో కలిసి దిగిన ఫొటోలను ఖుష్బూ ట్విట్టర్ ద్వారా షేర్ చేస్తూ.. ‘చివరికి నా కల నిజమైంది. నా హీరో రవిశాస్త్రిని కలుసుకున్నా. నిరీక్షణ ఫలించింది. ఆయణ్ని కలవడానికి 33 ఏళ్లు ఎదురుచూశా’ అంటూ రాసుకొచ్చింది.

కాంగ్రెస్‌ పార్టీ స్పోక్స్‌పర్సన్‌గా తమిళనాడులో బిజిగా ఉన్నా.. అడపాదడపా సినిమాల్లో తళుక్కుమంటూనే ఉన్న ఖుష్బూ.. ప్రస్తుతం పవన్‌ కల్యాణ్‌ 25వ చిత్రంలో నటిస్తోంది. ‘స్టాలిన్‌’ తర్వాత ఆమె పూర్తి పాత్రలో నటిస్తున్న సినిమా ఇదే కావడం విశేషం. ఇందులో ఖుష్బూ.. పవన్‌‌కు అత్తగా సందడి చేయనుంది. త్రివిక్రమ్‌ దర్శకత్వంలో తెరకెక్కుతోన్న ఈ సినిమాలో కీర్తీ సురేశ్‌, అనూ ఇమ్మాన్యుయెల్‌ హీరోయిన్లుగా నటిస్తున్నారు.
My dream comes true..finally I meet my #hero #RaviShastri..patience pays off..have waited for 33yrs to meet him.. pic.twitter.com/aZwqYlZI06 — khushbusundar (@khushsundar) September 18, 2017