GodFather OTT: ఓటీటీలోకి వచ్చేసిన చిరంజీవి ‘గాడ్‌ఫాదర్’ మూవీ.. స్ట్రీమింగ్ ఎక్కడంటే?

GodFather Movie OTT Release: మెగాస్టార్ చిరంజీవి (Megastar Chiranjeevi) నటించిన ‘గాడ్‌ఫాధర్’ సినిమా ఓటీటీలోకి వచ్చేసింది. మలయాళంలో వచ్చిన లూసిఫర్ సినిమాకి ఇది రీమేక్‌కాగా.. అక్టోబరు 5న విడుదలైన గాడ్‌ఫాదర్ (Godfather) మంచి టాక్‌ని సొంతం చేసుకుంది . కానీ కలెక్షన్ల పరంగా మాత్రం ఆశించిన మేర రాబట్టలేకపోయింది. ఈ సినిమాకి మోహన్‌ రాజా దర్శకత్వం వహించగా.. చిరంజీవితో పాటు సల్మాన్ ఖాన్, నయనతార, సత్యదేవ్ తదితరులు నటించారు. ఈ మూవీ శుక్రవారం రాత్రి నుంచి ఓటీటీలో సందడి చేస్తోంది. సూపర్ గుడ్ ఫిల్మ్స్ బ్యానర్‌పై నిర్మాత ఆర్.బీ చౌదరి ఈ సినిమాని నిర్మించారు. దర్శకుడు పూరి జగన్నాద్ కూడా ఈ సినిమాలో ఓ పాత్రని పోషించాడు. ఇటీవల గాడ్‌ఫాదర్ సినిమాని భారీ ధరకి ఓటీటీ సంస్థ నెట్‌ఫ్లిక్స్ సొంతం చేసుకోగా.. ఈ మేరకు శుక్రవారం అర్ధరాత్రి నుంచే ఆ ఓటీటీ ప్లాట్‌ఫామ్‌పై ఈ మూవీ స్ట్రీమింగ్ అవుతోంది. గాడ్‌ఫాదర్ మూవీకి తమన్ సంగీతం అందించాడు.

ఈ ఏడాది చిరంజీవి నటించిన ‘ఆచార్య’ మూవీ బాక్సాఫీస్ వద్ద బోల్తా కొట్టింది. దాంతో ఆ సినిమా తర్వాత వచ్చిన గాడ్‌ఫాదర్ మూవీపై చిరంజీవి భారీ అంచనాలు పెట్టుకున్నారు. అయితే.. అభిమానుల్ని మెప్పించిన ఈ సినిమా.. ఆ రేంజ్‌లో కలెక్షన్లని మాత్రం రాబట్టలేకపోవడం గమనార్హం. కన్నడ సినిమా ‘కాంతార’ కూడా గాడ్‌ఫాదర్ కలెక్షన్లని కొంత మేర గండికొట్టింది.

Read Latest Telugu Movies News , Telugu News