Nandamuri Balakrishna: అన్‌స్టాపబుల్ సీజన్-2 అంతకు మించి.. ఈ అభిమానమే నాకు శ్రీరామరక్ష: బాలకృష్ణ

Unstoppable With NBK సీజన్ 2తో అభిమానులను అలరించేందుకు వచ్చేశారు నందమూరి నటసింహం బాలకృష్ణ (Nandamuri Balakrishna). ఈ సీజన్ కోసం అభిమానులు ఎంతో ఆసక్తిగా ఎదురుచూస్తున్న తరుణంలో మంగళవారం విజయవాడలో అన్‌స్టాపబుల్ సీజన్-2 లాంచ్ ఈవెంట్ చాలా గ్రాండ్‌గా నిర్వహించారు. ఈ వేదికపై అన్‌స్టాపబుల్ సీజన్-2 టీజర్‌ను బాలకృష్ణ లాంచ్ చేశారు. ఈ టీజర్‌లో బాలయ్య ఎంతో పవర్‌ఫుల్‌గా కనిపించారు. ఈ ఈవెంట్‌కు అభిమానులు భారీ సంఖ్యలో తరలివచ్చారు.

ఈ సందర్భంగా బాలయ్య మాట్లాడారు. 'విజయదశమి సందర్భంగా ఈ కార్యక్రమాన్ని విజయవాడలో జరుపుకోవడం చాలా ఆనందంగా ఉంది. నందమూరి రామరావు గారు జన్మించిన జిల్లాలో నిర్వహించడం కాకతాళీయం. చాలా మంది నన్ను టీవీల్లో కనిపించడం లేదని నిరుత్సాహానికి గురైన వాళ్లు ఉన్నారు. ఎదురు చూసినవాళ్లు ఉన్నారు. సినిమాల్లోనే కనిపిస్తారు ఇక బయట టీవీలో కనిపించడులే అని అనుకున్న వాళ్లు ఉన్నారు. అల్లు అరవింద్ గారి మాటను గౌరవించి అన్‌స్టాపబుల్ షోను చేశా.

మనిషిలోని రకరకాల కోణాలను ఆవిష్కరించినప్పుడే ఆ పని సత్ఫలితం సాధిస్తుందనేది నా నమ్మకం. ఆ అవకాశం నాకు ఈ రూపంలో వచ్చింది. అన్ని విషయాలను మనం పాజిటివ్‌గా తీసుకోవాలి. కేవలం సక్సెస్‌ వచ్చినప్పుడు ఆనంద పడిపోకూడదు.. ఫెయిల్యూర్‌ను కూడా స్వీకరించాలి. పట్టుదలతో కృషి చేసి మనం మళ్లీ ముందుకు సాగాలి.

నాన్న గారు ముందు చూపుతో సినిమాలు చేశారు. అయితే వాటిలో కొన్ని ఆడలేదు. తోడు దొంగలు, పిచ్చి పుల్లయ్య వంటి సినిమాలు ఆడలేదు. ఎందుకంటే ఆయన వచ్చే జనరేషన్‌ను దృష్టిలో పెట్టుకుని తీశారు. అలాగే నేడు ప్రపంచం మారిపోతుంది. థియేటర్స్, టీవీలు దాటి మన అరచేతిలోకి వచ్చేసింది. ఇది మన అభిమానుల సత్తా. ఒక బటన్ నొక్కితే చాలు వినోదం మన ముందు ఉంటుంది.

మొదటి సీజన్ కంటే ఈ అన్‌స్టాపబుల్ సీజన్-2 ఎక్కువ హిట్ అవుతుంది. అభిమానులు నా నుంచి ఏమి ఆశించకుండా కురిపిస్తున్న అభిమానమే నాకు శ్రీరామరక్ష. అభిమానం డబ్బులో కొనలేనిది కాదు.. ప్రలోభాలు పెడితే రాదు.. అటువంటి అభిమానాన్ని నేను సంపాదించాను. ఇంకా ఈ ప్రయత్నం కొనసాగుతూనే ఉంటుంది. సినిమాలతో పాటు ఈ మాధ్యమంలో కూడా నేను కొనసాగుతా. నాకు స్ఫూర్తి ప్రదాత అన్‌స్టాపబుల్ షో. నేను అడుగువేసిన ఈ రంగాన్ని విజయం చేసిన ఘనత ప్రతి ఒక్కరికీ దక్కుతుంది. ఆహా వాళ్లు చేపట్టిన ప్రతి ప్రోగ్రామ్ విజయవంతం కావాలని కోరుకుంటున్నా..' అంటూ బాలయ్య చెప్పుకొచ్చారు. ఈ సందర్భంగా యాంకర్‌తో సరదాగా ముచ్చటించారు.