ఆ సినిమా ఎలా ఒప్పుకున్నావ్? అన్నారు: వరుణ్ తేజ్

తన గత సినిమా ‘మిస్టర్’ విషయంలో ఆసక్తికరమైన వ్యాఖ్యలు చేశాడు వరుణ్ తేజ్. ప్రస్తుతం ‘ఫిదా’ సినిమాతో ప్రేక్షకుల ముందుకు వస్తున్న వరుణ్ ‘మిస్టర్’ ఫ్లాఫ్ విషయంలో చేసిన వ్యాఖ్యలు ఆసక్తికరంగా ఉన్నాయి. శ్రీనువైట్ల దర్శకత్వంలో రూపొందిన ఆ సినిమా ఏ మాత్రం ఆకట్టుకోలేకపోయింది. వైవిధ్యమైన ప్రేమకథతో వస్తున్నట్టుగా ముందు చెప్పారు కానీ, తీరా విడుదల అయిన తర్వాత మాత్రం విమర్శలు తప్పలేదు. ఈ నేపథ్యంలో ‘మిస్టర్’ ఫలితం గురించి వరుణ్ మాట్లాడుతూ.. ఆ సినిమా విషయంలో అభిమానులు కూడా గట్టిగా ప్రశ్నించారని అన్నాడు.

ప్రత్యేకించి చిరంజీవి అభిమానులైతే... ‘అసలు ఎలా ఒప్పుకున్నావ్ ఈ సినిమాను?’ అని తనను ప్రశ్నించారని వరుణ్ తెలిపాడు. తప్పటడుగులు పడ్డాయి.. అని వరుణ్ వ్యాఖ్యానించాడు. ఆ సినిమా ఫెయిల్యూర్ కారణాలు ఏంటనేది అంతా కూర్చుని విశ్లేషించుకున్నామని తెలిపాడు. అయితే అది మరీ అంత దారుణ పరాజయం పాలవుతుందని మాత్రం అనుకోలేదన్నాడు.

‘ఫిదా’ విషయానికి వస్తే.. ఇదొక మంచి ప్రేమకథ అని వరుణ్ అన్నాడు. సాధారణంగా ప్రేమకథా సినిమాలంటే తన తండ్రి నాగబాబుకు అస్సలు నచ్చవని.. ‘ఫిదా’ చూశాకా ఆయన కూడా అభినందించాడని అన్నాడు. రామ్ చరణ్ తేజ నిర్మాణంలో సినిమా చేసేందుకు సిద్ధమే అని, అందుకు తగిన కథ కోసం చూస్తున్నామన్నాడు. తన తండ్రి నాగబాబును మళ్లీ నిర్మాతగా చూడాలని అనుకుంటున్నట్టుగా తెలిపాడు.