Tourist Tax: ఏప్రిల్ 1 నుంచి పర్యాటక పన్నును పెంచనున్న బార్సిలోనా..

యూరప్‌లోని అద్భుతమైన దేశాల్లో ఒకటి స్పెయిన్. ఇదెంతో అందంగానూ ఉండటంతో నిత్యం ప్రపంచ వ్యాప్తంగా ఉండే టూరిస్టులను ఆకర్షిస్తుంటుంది. దీంతో ఈ దేశానికి చాలా మంది పర్యాటకులు వచ్చి హ్యాపీగా సందర్శించి వెళ్తుంటారు. అయితే, స్పెయిన్‌లోని కాటలోనియా ప్రావిన్స్‌కు చెందిన బార్సిలోనా సైతం మంచి పర్యాటక ప్రదేశం. అక్కడికి కూడా టూరిస్టులు పెద్ద ఎత్తున వెళ్తుంటారు. ఈ క్రమంలోనే ఇప్పుడు ఆ నగరం పన్నును పెంచనుంది. ఏప్రిల్ 1 నుంచి దాన్ని అమలు చేయనుంది. (Photo Credit: Unsplash)

స్పెయిన్‌లోని అత్యంత ప్రసిద్ధ పర్యాటక ప్రదేశాల్లో బార్సిలోనా ముందుంటుంది. ముఖ్యంగా అది గొప్ప చరిత్ర, అద్భుతమైన వాస్తుకళా శిల్ప సౌందర్యం, సంస్కృతి సంప్రదాయాలు, అందమైన బీచ్‌లకు ప్రసిద్ధి చెందింది. అలాంటి ప్రదేశాన్ని ఒకసారి సందర్శించిన తర్వాత ఎప్పటికీ మరచిపోలేరని కచ్చితంగా చెప్పొచ్చు. అయితే, ఇటీవలే అక్కడి స్థానిక అధికారులు వచ్చేనెల 1 నుండి ఆ నగరాన్ని సందర్శించే వారికి పర్యాటక పన్నును పెంచుతారని వెల్లడించారు.

సహజంగానే ప్రపంచవ్యాప్తంగా ఉన్న చాలా దేశాలు టూరిస్ట్ ట్యాక్స్ పేరిట ప్రాంతీయ, నగర వ్యాప్త పర్యటనలకు కొంతమొత్తం వసూలు చేస్తారు. అలా బార్సిలోనా 2012 నుండి టూరిస్ట్ ట్యాక్స్‌ను వసూలు చేస్తోంది. ఇప్పుడు ఆ పన్నుల ధరనే కొంచెం పెంచింది. దీంతో ఏప్రిల్ 1 నుండి €2.75 బార్సిలోనా మునిసిపల్ ఫీజు చెల్లించాలి. ఇది ఈ ఒక్క ఏడాదికి మాత్రమే. వచ్చే ఏడాది ఏప్రిల్ 1 నుండి ఆ టూరిస్ట్ ట్యాక్స్ €3.25కి పెరగనుంది. అయితే, ఇది కేవలం ప్రధాన జిల్లాల్లో అధికారిక పర్యాటక బసకు మాత్రమే సర్‌చార్జిలను విధించనున్నారు.

బార్సిలోనా నగర పాలక సంస్థ తెలిపిన వివరాల ప్రకారం.. పర్యాటక పన్ను పెంపుదల ప్రధానంగా నగరాన్ని సందర్శించడానికి వచ్చే పర్యాటకుల సంఖ్యను నియంత్రించడానికి, అలాగే వారికి మెరుగైన టూరిస్ట్ సేవలను అందించడానికని చెప్పారు. కాగా, బార్సిలోనా కొద్ది కాలంగా ఇతర ప్రసిద్ధ పర్యాటక ప్రాంతాల మాదిరిగానే ఓవర్‌టూరిజంతో ఇబ్బంది పడుతోంది. దీంతో కొంతమంది పర్యాటకులనైనా తగ్గించడానికి ఈ టూరిస్ట్ ట్యాక్స్‌ను పెంచనుంది. ఈ సర్‌చార్జితో నగర పాలక సంస్థ మౌలిక సదుపాయాలను మెరుగుపర్చనుంది.