ఈ రూటే గజిబిజి.. ప్రయాణం చాలా ఈజీ!

దాదాపు 5 అంతస్థులంత ఎత్తు, 20 ర్యాంపులు. ట్రాఫిక్‌లో చిక్కుకోకుండా ఎనిమిది దిక్కులకు ప్రయాణించేందుకు వీలుగా నిర్మించిన ఈ ఓవర్ పాస్ వంతెనలను చూశారా! చాలా గజిబిజిగా ఉంది కదూ. ఇలాగైతే వాహనదారులు గందరగోళానికి గురవ్వరా? అనే కదా మీ డౌటు. అయితే, ఈ ఓవర్ పాస్‌ల మీదుగా ప్రయాణం చాలా ఈజీ అని నిర్వాహకులు అంటున్నారు. ఇంతకీ, ఈ గజిబిజి ఓవర్ పాస్ ఎక్కడుందో తెలుసా? ఇంకెక్కడ మన పొరుగు దేశం చైనాలోనే.

చాంగ్‌క్వింగ్‌లో నిర్మించిన ఈ ఇంటర్‌చేంజ్ ఓవర్ పాస్‌ వంతెనలను నిర్మించేందుకు దాదాపు ఎనిమిదేళ్లు పట్టింది. 2009లో ప్రారంభించిన ఈ ఓవర్ పాస్‌ల నిర్మాణాలు మే 31న పూర్తయ్యాయి. ఎయిర్ పోర్ట్ ఎక్స్‌ప్రెస్ వే పూర్తి కాగానే వచ్చే ఏడాది నుంచి ఈ ఓవర్ పాస్‌ను ప్రారంభించనున్నారు.

ఈ నిర్మాణం చూసి.. అక్కడి ప్రజలు చాలా గందరగోళంగా ఉందనే అభిప్రాయం వ్యక్తం చేస్తున్నారు. అయితే, బిల్డర్లు మాత్రం దీన్ని ఈ ఓవర్ పాస్‌లపై ప్రయాణం చాలా సులభం అని తెలుపుతున్నారు. వాహనదారులు తాము చేరుకోవల్సిన గమ్యస్థానాలను తెలుపుతూ సూచికలు ఏర్పాటు చేశారు. పొరపాటున వేరే మార్గానికి మళ్లితే వెనక్కి వచ్చేందుకు ప్రతి 500 మీటర్లు నుంచి కిలోమీటరు దూరంలో యూ టర్న్‌లు ఏర్పాటు చేశారు.