హైవే పక్కనే అందమైన ప్రాంతం..
ఈ ముజప్పిలంగాడ్ బీచ్ 66 జాతీయ రహదారి పక్కనే ఉంటుంది. దీంతో ఈ హైవేపై ప్రయాణించే వారికి ఈ ప్రాంతమంతా చూడముచ్చటగా ఉంటుంది. ఈ బీచ్ కన్నూర్, తలస్సెరీ అనే పర్యాటక ప్రదేశాల నడుమ ఉండటంతో పర్యాటకులు సైతం ఇక్కడికి తేలిగ్గా వస్తుంటారు. ఈ హైవేపై అరేబియన్ మహా సముద్రాన్ని చూస్తూ వెళితే అసలైన మజా ఉంటుంది. (Photo Credit: @safal__hri_thik2/Instagram)
ఇక్కడ బీచ్ ఫెస్టివల్ అదుర్స్..
ఇక్కడ ఏటా ఏప్రిల్ నెలలో బీచ్ ఫెస్టివల్ నిర్వహిస్తారు. ఈ బీచ్ కేరళలోని కన్నూర్ జిల్లాలో ముఖ్యమైన పర్యాటక ఆకర్షణలలో ఒకటిగా ఉండటంతో తీరం వెంబడి డ్రైవింగ్ చేయడానికి స్వర్గధామంగా ఉంటుంది. దీంతో యువత కూడా ఈ ఫెస్టివల్ సమయంలో పెద్ద ఎత్తున వచ్చి డ్రిఫ్టింగ్ చేస్తారు. అలాగే తమ బైక్ స్టంట్లతో అలరిస్తారు. ఈ ఫెస్టివల్ చూడటం చాలా అద్భుతంగా ఉంటుంది. (Photo Credit: @abhi_jithuzz/Instagram)
ఈ బీచ్‌కు ఎలా వెళ్లాలంటే..
ఈ బీచ్‌లో డ్రైవింగ్ చేయాలంటే తెల్లిచెర్రి నుండి కన్నూర్ వైపు వెళ్తుంటే రైల్వే ఓవర్ బ్రిడ్జికి కాస్త ముందు ఎడమవైపు మళ్లాలి. దీంతో మీరు కొబ్బరి చెట్లతో ఉండే అందమైన బీచ్‌లోకి ఎంటర్ అవుతారు. అక్కడి నుండి దాదాపు 4 కిలోమీటర్ల పొడవైన ఇసుక తిన్నెల్లో హ్యాపీగా డ్రైవింగ్ చేయొచ్చు. ఇక్కడ రుచికరమై సీఫుడ్‌ కూడా ఆహార ప్రియులకు నచ్చుతుంది. (Photo Credit: @_mr_power_cruiser/Instagram)
నడుచుకుంటూ వెళ్లే ఐలాండ్..
ఈ ముజప్పిలంగాడ్ బీచ్ సమీపంలోనే ధర్మడామ్ ఐలాండ్ ఉంటుంది. ఇది అరేబియా సముద్ర జలాల్లో పచ్చటి చెట్లతో నిండి ఉండటంతో పర్యాటకుల్ని అలరిస్తుంది. అయితే, సముద్రంలో అలలు తక్కువగా ఉన్నప్పుడు అక్కడికి నడుచుకుంటు కూడా వెళ్లొచ్చు. కానీ, ఎవరైనా అలా వెళ్లాలని సాహసిస్తే తగిన జాగ్రత్తలు తీసుకోవడం మంచిది. (Photo Credit: @safal__hri_thik/Instagram)
వింటర్‌లో వెళితే మరో ప్రత్యేకత..
ఇక్కడికి శీతాకాలంలో వెళితే మరో ప్రత్యేకతను కూడా ఆస్వాదించొచ్చు. చలికాలంలో ఇక్కడికి అనేక రకాల విదేశీ పక్షులు వలస వస్తాయి. దీంతో అవి తీరం వెంబడి విహరిస్తూ పర్యాటకులను అలరిస్తాయి. దీంతో పక్షి ప్రేమికులు మరింత ఆస్వాదించే అవకాశం ఉంటుంది. 2013లో ఇక్కడ తొలిసారి పెక్టోరల్ సాండ్‌పైపర్, క్యాస్పియన్ ప్లై ఓవర్ వంటి అరుదైన పక్షుల్ని గుర్తించారు. (Photo Credit: @ranjithkedaram/Instagram)
ప్రతి ఒక్కరూ తప్పక చూడాల్సిందే..
లేట్ 90s నుండి ఈ బీచ్‌కు శీతాకాలంలో యూరోపియన్ పర్యాటకులు అధికంగా రావడం మొదలైంది. అయితే, మన దేశంలోనే చాలా మందికి ఈ బీచ్ ప్రత్యేకత తెలియదు. భారతీయులతో పాటు విదేశీ పర్యాటకులు సైతం ఇది తప్పక చూడాల్సిన ప్రదేశం. ఇక్కడ రెస్టారెంట్లు, రిసార్టులు కూడా ఉండటంతో మంచి టూరిస్ట్ డెస్టినేషన్‌గా మారింది. మీక్కూడా బీచ్‌లో డ్రైవింగ్ చేయాలనే ఆశ ఉంటే ఎంచక్కా బండేసుకొని ఇక్కడికి వెళ్లండి. (Photo Credit: @__paa_chu_zz/Instagram)
ఇక్కడికి ఎలా వెళ్లాలంటే..
దేశీయ లేదా అంతర్జాతీయ పర్యాటకులు ఇక్కడికి వెళ్లాలంటే దగ్గరి విమానాశ్రయం కన్నూర్ అంతర్జాతీయ ఎయిర్‌పోర్ట్. ఇది 27 కిలోమీటర్ల దూరంలో ఉంటుంది. లేదా కారీపుర్ అంతర్జాతీయ విమానాశ్రయానికి కూడా రావచ్చు. ఇది 106 కిలోమీటర్ల దూరంలో ఉంది. ఇక రైల్వే స్టేషన్లు అయితే ఎడక్కడ్ రైల్వే స్టేషన్ కేవలం 2 కిలోమీటర్లే. తలస్సెరీ 7 కిలోమీటర్లు, కన్నూర్ 15 కిలోమీటర్లు. ఇక రోడ్డు మార్గంలో రావాలనుకుంటే ఎవరైనా కన్నూర్ నుండి తేలిగ్గా చేరుకోవచ్చు. (Photo Credit: @real_varunvijayan/Instagram)
Read All Latest Telugu News and Travel News