Dalhousie : రొమాంటిక్ డెస్టినేషన్‌కు వెళ్లాలనుకుంటున్నారా? ఈ శీతాకాలంలో డల్‌హౌసీకి వెళ్లిరండి

పర్యాటక లోకంలో డల్‌హౌసీకి (Dalhousie Tourist Places) ప్రత్యేకమైన గుర్తింపు ఉంది. హిమాచల్ ప్రదేశ్‌లోని ప్రధాన టూరిస్ట్ అట్రాక్షన్లలో ఇదీ ఒకటి. దీంతో ఆ రాష్ట్రానికి పర్యాటనకు వెళ్లే వారు ఈ డల్‌హౌసీని కూడా తప్పక చూసొస్తారు. ఈ ప్రాంతం మొత్తం ఐదు కొండలపైన ఉండటంతో ప్ర‌కృతి సోయ‌గాలకు కొదవేలేదు. ముఖ్యంగా ధౌలాధర్ రేంజ్ పర్వత శ్రేణులు ఇక్కడి నుండి మంచుతో కప్పి ఉన్నట్లు కనిపిస్తుంటాయి. దీంతో ఆ ప్రాంతమంతా రమ్య మనోహరంగా ఉంటుంది. నూతన జంటలు, ఫ్యామిలీస్‌కి ఈ ప్రాంతం సరైన టూరిస్ట్ స్పాట్ అని చెప్పొచ్చు. 1854లో లార్డ్ డల్‌హౌసీ ఈ ప్రాంతాన్ని కనుగొనడంతో ఈ పేరొచ్చింది. ఈ క్రమంలోనే డల్‌హౌసీ బ్రిటీషర్లకు సమ్మర్ డెస్టినేషన్‌గా మారింది.

ఇక్కడికి ఎందుకు వెళ్లాలంటే..

ధౌలాధర్ పర్వత శ్రేణులు (Photo Credit: Unsplash)

చుట్టూ అందమైన పర్వతాలు, వాటికి ఆనుకొని పెద్ద పెద్ద పైన్ చెట్లు, ఓక్ చెట్లు ఈ ప్రాంతాన్ని మరింత కొత్తగా కనిపించేలా చేస్తాయి. అలాగే ధౌలాధర్ పర్వత శ్రేణులు (Dhauladhar Mountain Range) తెల్ల మంచు దుప్పటితో కనిపిస్తుండటంతో డల్‌హౌసీ మరింత ప్రత్యేకతను సంతరించుకుంది. ఈ అందమైన ప్రాంతం చుట్టూ చూడదగిన ప్రదేశాలు కూడా ఉన్నాయి. మినీ స్విట్జర్‌లాండ్‌గా పిలిచే ఖజ్జియార్, బక్రోటా హిల్స్, రంగ్ మహాల్, సుభాష్ బావోలి, పంచపుల, సద్ధారా ఫాల్స్, దైనీకుండ్ పీక్, చమెరా లేక్, కాలాటాప్ తదితర ప్రదేశాలున్నాయి.

మోతీ టిబ్బా పర్వత ప్రాంతం..
మోతీ టిబ్బా అనే పర్వత ప్రాంతం డల్‌హౌసీలోని గాంధీ చౌక్ నుండి సుమారు 330 మీటర్ల ఎత్తులో ఉంది. మీరు ప్రకృతి ఒడిలో సేదతీరాలంటే ఇక్కడికి తప్పకుండా వెళ్లొచ్చు. ఇది మొత్తం అటవీ ప్రాంతం కాబట్టి దట్టమైన పైన్ చెట్లు, ఫిర్ చెట్లు, ఓక్ చెట్లలతో నిండి ఉంటుంది. దీంతో ఇక్కడ పర్యాటకులు స్వచ్ఛమైన గాలిని ఆస్వాదించొచ్చు. ఇక్కడ ఫొటోషూట్లకు కూడా బాగుంటుంది.

పంచపుల వాటర్ ఫాల్స్..
డల్‌హౌసీకి దగ్గర్లోనే ఉన్న మరో అందమైన ప్రదేశం పంచపుల వాటర్ ఫాల్స్. ఇక్కడ వర్షాకాలంలో కనిపించే జలపాతాలు పర్యాటకుల్ని మరింత ఆకర్షిస్తాయి. ఇది కూడా అందమై ప్రాంతం కావడంతో ఫ్యామిలీస్‌కి చాలా బాగుంటుంది. ఈ ప్రాంతంలో అనేక ట్రెక్కింగ్ పాయింట్లు ఉండటంతో నిత్యం సాహస ప్రియులు వస్తుంటారు. ఇక్కడ నీటి లభ్యత ఎక్కువ కాబట్టి చుట్టు పక్కల ప్రాంతాలకు సరఫరా చేస్తారు.

చమేరా సరస్సులో బోట్ రైడింగ్..

Representational Image/Photo Credit: Unsplash

చమేరా అనేది కృత్రిమ సరస్సు. దీని చుట్టూ అందమైన పచ్చని చెట్లు అద్భుతమైన లోయలు ఉన్నాయి. ఇక్కడ బోట్ రైడింగ్, ఫిషింగ్‌తో పాటు వివిధ వాటర్ స్పోర్ట్స్‌ను ఎంజాయ్ చేయొచ్చు. ఈ సరస్సు సముద్ర ఉపరితలం నుండి 763 మీటర్ల ఎత్తులో ఉంది. ఈ సరస్సు ద్వారా చుట్టుపక్కల గ్రామలకు నీరందిస్తారు. చంబా లోయ లేదా డల్హౌసీకి వెళ్లేవారు తప్పక ఈ సరస్సును కూడా చూడాలి.

అందమైన బక్రోటా కొండలు..
డల్‌హౌసీలో బక్రోటా కొండలు కూడా అత్యంత అందంగా ఉంటాయి. చుట్టూ మంచుతో నిండిన పర్వతాలు, నిర్మలమైన ప్రకృతి దృశ్యాలతో పర్యాటకులకు కొత్త అనుభూతికి గురవుతారు. ఇది డల్హౌసీకి కేవలం 5 కి.మీ దూరంలో ఉండటంతో పర్యాటకులు తేలిగ్గా అక్కడికి వెళ్లగలరు. ఈ ప్రదేశానికి వెళ్తే మనసు ప్రశాంతంగా మారుతుంది. అక్కడే 'బక్రోటా మాల్' అనే మరో చూడదగ్గ ప్రదేశం కూడా ఉంది.

రంగ్ మహాల్ ప్యాలెస్..
రంగ్ మహాల్ అనే అద్భుతమైన ప్యాలెస్‌ను 18వ శతాబ్దంలో రాజా ఉమేద్ సింగ్ కట్టించారు. తమ కుటుంబంలోని మహిళల కోసం ప్రత్యేకంగా దీన్ని నివాసంగా ఏర్పాటు చేశారు. ఈ ప్యాలెస్ బ్రిటిష్, మొఘల్ వాస్తుశిల్పాల సంపూర్ణ సమ్మేళనంతో ఉంటుంది. అలాగే ఈ ప్యాలెస్ గోడలు శ్రీకృష్ణుని జీవిత కథలను వివరించే చిత్రాలతో అలంకరించి ఉంటాయి. ఇది ఉదయం 10 నుండి మధ్యాహ్నాం 1కి వరకు.. మధ్యాహ్నం 2 నుంచి సాయంత్రం 5 వరకే ఓపెన్ ఉంటుంది.

సుభాష్ బావోలి..
ప్రముఖ స్వాతంత్ర సమరయోధుడు సుభాష్ చంద్రబోస్ కొద్దికాలం డల్హౌసీలో ఉన్నప్పుడు ఇక్కడ ఒక గెస్ట్‌హౌస్‌లో ఉండేవారని ప్రసిద్ధి. అక్కడే ధ్యానం చేసేవారని స్థానికులు చెబుతారు. అదే ఇప్పుడు సుభాష్ బావోలీగా పర్యాటక ప్రదేశంగా మారింది. దీంతో పర్యాటకులు కూడా ఇక్కడకు వచ్చి కాసేపు సేదతీరుతుంటారు. ఇక్కడి నుంచి చుట్టు పక్కల ప్రాంతాల్లో పర్వతాలను చూస్తే ప్రకృతి అందాలను ఆస్వాదించొచ్చు. అందుకు తగిన సీటింగ్ కూడా ఏర్పాటు చేశారు.

ఖజ్జియార్ లేక్..

Khajjiar Lake/Photo Credit:Unsplash

ఇక డల్‌హౌసీలోనే మినీ స్విట్జర్‌ల్యాండ్ ఉంది. ఇది అచ్చం చూడటానికి స్విట్జర్‌ల్యాండ్‌లా ఉండటంతో ఈ పేరొచ్చింది. ఇది కూడా ఫ్యామిలీస్‌కి మంచి పిక్నిక్ స్పాట్‌గా మారింది. ఇక్కడుండే ఖజ్జియార్ లేక్ నిత్యం పర్యాటకులతో ఆహ్లాదంగా ఉంటుంది. దీంతో డల్‌హౌసీకి వెళ్లిన వారు ఖచ్చితంగా ఈ ఖజ్జియార్‌ పరిసర ప్రాంతాలను కూడా చూస్తారు.

Read All Latest Telugu News and Travel News