Karaikudi: ఇలాంటి అందమైన భవన సముదాయాలు చూడాలంటే కరై‌కుడి వెళ్లాల్సిందే..!

తమిళనాడులోని కరైకుడి అనే అందమైన పట్టణం స్థానికంగా చాలా ప్రసిద్ధి చెందింది. అక్కడి భవన సముదాయాలు విశేష గుర్తింపును పొందాయి. మనం తమిళ సినిమాల్లో చూసే ఇళ్లు ఎక్కువగా ఈ ప్రాంతంలో ఉన్నట్లే ఉంటాయి. ఆ అరుదైన భవన సముదాయాలు చూడటానికి ఎంతో అద్భుతంగా ఉంటాయి. వాటిని ఒకప్పుడు చెట్టియార్లు అనే తమిళ సంప్రదాయ సంపన్న వ్యాపార వర్గాల వారు నిర్మించడం విశేషం. ఈ అందమైన మ్యాన్షన్లు ఈ ప్రాంతంలో సుమారు 11 వేల వరకు ఉంటాయని తెలుస్తోంది. ఈ చెట్టియార్లు 19, 20వ దశాబ్దాల్లో తమిళనాడు ఆర్థిక వ్యవస్థలో ముఖ్య భూమిక పోషించారు. అయితే, కొన్ని అనుకోని కారణాల వల్ల చాలా మంది ఆ భవన సముదాయాలను విడిచిపెట్టి వెళ్లిపోయారు. దీంతో ఇప్పుడు ఆ సముదాయాల్లోని చాలా భవనాలు జనాలు లేక సందర్శనీయ స్థలాలుగా మారిపోయాయి. (Photo Credit: Surkath/Creative Commons Attribution)

ఈ భవన సముదాయాలను చెట్టియార్లు ప్రత్యేకమైన నిర్మాణశైలితో నిర్మించారు. వాటిని తమిళం, యూరోపియన్ నిర్మాణశైలిలో రూపొందించడంతో గ్రాండ్ లుక్‌తో కనువిందు చేస్తాయి. అందువల్లే ఇప్పుడా కరైకుడి అనే పట్టణం పర్యాటక ప్రదేశంగా మారిపోయింది. ఆయా భవనాల్లోని ఇంటీరియర్, ఎక్స్‌టీరియర్ అందాలు పర్యాటకుల్ని విశేషంగా ఆకట్టుకుంటాయి. బయటివైపు ఒకలా, లోపలి వైపు మరోలా తీర్చిదిద్దడం చెట్టియార్ల అభిరుచికి నిదర్శనంగా నిలుస్తాయి. ఆయా భవనాలు బయటివైపు రాళ్లు, చెక్కలతో అద్భుతంగా తీర్చిదిద్దారు. అలాగే లోపలి భాగాల్లో చెక్కలు, రంగు రంగుల పలకలతో సర్వాంగ సుందరంగా నిర్మించారు. అలా ఈ పాత భవనాలు చాలా ప్రత్యేకమైన నిర్మాణ శైలిని కలిగి ఉన్నాయి. మరోవైపు ఆయా భవనాల్లో కొన్ని విశాలమైన ప్రదేశాలను కలిగి ఉన్నాయి. ఇక బహిరంగ ప్రదేశాలు, లోపలి భాగాల్లోనూ కొన్ని చోట్ల పైకప్పులు లేకుండా నిర్మించారు. దీంతో అప్పట్లో వారు ఉక్కపోత లేకుండా మంచి వెంటిలేషన్ సౌకర్యాన్ని ఏర్పాటు చేసుకున్నారు.

ఈ సముదాయాల్లోని అనేక భవనాలు 20వ శతాబ్దం ప్రారంభంలో నిర్మించినవని తెలుస్తోంది. వాటిని చూస్తే చెట్టియార్లు ఎంత గొప్పగా జీవించారో అర్థం చేసుకోవచ్చు. ఈ భవన నిర్మాణాలను చూస్తేనే వారి సంపద, ప్రభావం ఏపాటిదో ఊహించుకోవచ్చు. అయితే, చెట్టియర్లలోని చాలా కుటుంబాలు తరతరాల పాటు ఆయా భవన సముదాయాల్లోనే ఉండేవారు. దీంతో వారు ఈ కరైకుడిని తమ వ్యాపార కేంద్రంగానూ మార్చుకున్నారు. కొన్ని కారణాల రీత్యా చెట్టియార్లు కాలక్రమేణా ఈ ప్రాంతాన్ని వదిలి వెళ్లడంతో అందులోని చాలా సముదాయాలు ఇప్పుడు హోటల్స్‌ రిసార్ట్స్‌గా మారాయి. దీంతో అవి ఇప్పుడు పర్యాటకులకు అరుదైన గమ్యస్థానంగా నిలిచింది. అలాగే అక్కడున్న మ్యూజియంలో చెట్టియార్ల జీవన శైలి, వారి వ్యాపార విషయాలకు సంబంధించిన అనేక విషయాలు తెలుసుకోవచ్చు. దీంతో ఇది చరిత్ర, సంస్కృతిపై ఆసక్తి ఉన్నవారు తప్పక సందర్శించాల్సిన పట్టణంగా చెప్పొచ్చు. మీకూ ఆసక్తి ఉంటే ఒకసారి వెళ్లిరావడానికి ప్రయత్నించండి. (Photo Credit: Joelsuganth/Creative Commons Attribution)

• Read All Latest Telugu News and Travel News