నాలుగు నెలల తర్వాత తెరుచుకున్న లేహ్ - శ్రీనగర్ హైవే

లడఖ్ ను దేశంలోని మిగతా ప్రాంతాలతో కలిపే 434 కిలోమీటర్ల శ్రీనగర్ - లేహ్ హైవేను ప్రస్తుత సంక్షోభ పరిస్థితుల మధ్య అవసరమైన వస్తువులను రవాణా చేయడానికి బోర్డర్స్ రోడ్ ఆర్గనైజేషన్ (బి‌ఆర్‌ఓ) ప్రారంభించింది. హిమపాతం కారణంగా గత ఏడాది డిసెంబర్ నుండి ఈ హైవే మూసివేయబడింది. ఈ మార్గంలో మంచు తొలగించడానికి బిఆర్ఓ మునుపటి 60 సంవత్సరాల కంటే ఎక్కువ కష్టపడాల్సి వచ్చింది.

ఈ వ్యూహాత్మక మార్గంలో ట్రాఫిక్ ను తిరిగి ప్రారంభించడం గురించి రక్షణ మంత్రిత్వ శాఖ అధికారి ఒకరు మాట్లాడుతూ... 11500 అడుగుల ఎత్తులో ఉన్న జోజిలా పాస్ నుండి 18 ట్యాంకర్లు మరియు ఇతర నిత్యావసర వస్తువులను లేహ్ వైపుకు వెళ్లడానికి అనుమతించినట్లు తెలిపారు.

లడఖ్ డివిజనల్ కమిషనర్ ఆదేశాల మేరకు కేంద్ర భూభాగమైన లడఖ్ లో నిత్యావసర వస్తువులను నిల్వ చేయాల్సిన అవసరం ఉందని నివేదించారు. దీన్ని దృష్టిలో పెట్టుకుని ప్రాజెక్ట్ బెకన్, ప్రాజెక్ట్ విజయక్ బృందం జోజిలా చుట్టూ తాజా మంచును తొలగించి రహదారిని రాకపోకలకు అనువుగా మార్చారు.

Read Also: నందాదేవి నేషనల్ పార్క్ లో కనిపించిన అరుదైన మంచు చిరుతలు

లడఖ్ ను దేశంలోని ఇతర ప్రాంతాలకు అనుసంధానించే వ్యూహాత్మక మార్గం కనుక ఈ రహదారిని తెరవడానికి బిఆర్ఓ నిశ్చయించుకుంది. అలాగే రహదారిపై పేరుకున్న మంచును తొలగించినట్లు అధికారులు వెల్లడించారు. కరోనా వైరస్ నేపధ్యంలో రహదారిని తెరవాలనే ఈ ఆలోచనకు వ్యతిరేకంగా లడఖ్ పరిపాలన ఉందని ఒక అధికారి తెలిపారు. లడఖ్ డివిజనల్ కమిషనర్ జారీ చేసిన ఉత్తర్వుల ప్రకారం... తదుపరి ఆదేశాలు వచ్చే వరకు పరిమిత సంఖ్యలో ట్రక్కులు, ఆయిల్ ట్యాంకర్లు మాత్రమే జోజిలా పాస్ దాటడానికి అనుమతించబడతాయి.

ఏప్రిల్ 1 మరియు 2వ తేదీలలో జోజిలా పాస్ భారీ హిమపాతాన్ని ఎదుర్కొంది. దీంతో ఈ మార్గాన్ని మూసి వేశారు. తాజాగా బిఆర్ఓ మంచు తొలగింపు చర్యలు చేపట్టి ఈ మార్గాన్ని ప్రయాణాలకు అనువుగా మార్చింది.

Read Also: ఈ గ్రామంలో రోడ్లు ఉండవు... మరి ప్రయాణాలు ఎలా?